ریچارد بېنټ: د طالبانو له بنده د خبریال مرتضی بهبودي په خوشې کېدو خوښ یم
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بېنټ د طالبانو له بنده د مرتضی بهبودي د خوشې کېدو هرکلی وکړ.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بېنټ د طالبانو له بنده د مرتضی بهبودي د خوشې کېدو هرکلی وکړ.
نوموړي تېره شپه پر خپلې اېکس پاڼې لیکلي چې، د طالبانو له بنده د مرتضی بهبودي په خوشې کېدو خوشاله دی او هیله لري چې نوموړی او کورنۍ به یې یوځای هوسا وخت ولري.
د افغاني الاصله فرانسوي خبریال کورنۍ د چهارشنبې په ورځ( د تلې په ۲۶مه) افغانستان انټرنشنل ته ومنله، چې طالبانو ښاغلی بهبودي له ۲۸۴ ورځو بند وروسته خوشې کړی دی.
د بې پولې خبریالانو سازمان په یوې وینا پاڼه کې لیکلي، چې ښاغلی بهبودي د طالبانو د «محکمې په حکم خوشې شوی دی».
د طالبانو قضایي چارواکو تر اوسه د دغه خبریال د نیولو او پر هغه د لګول شویو تورونو په اړه څه نه دي ویلي.
د بې پولې خبریالانو د سازمان په وینا، دغه خبریال د کابل په یوې محکمه کې «د جاسوسۍ، د بهرنیانو د ناقانونه ملاتړ او له پولې هاخوا د خلکو تېرولو د مرستې په تور محکمه شوی و» او قاضي له دې تورونو برائت ورکړ.
بهبودي د تېر ۱۴۰۱ کال د مرغومې پر ۱۵مه په کابل کې د طالبانو لهخوا نیول شوی و.
