د امریکا په واشنګټن کې د طالبانو پر ضد د پخوانیو افغان امنیتي او دفاعي ځواکونو، جنرالانو، افسرانو او نورو افغانانو په ګډه د افغانستان متحدې جبهې په نوم یو سیاسي او پوځي خوځښت جوړ کړ.
د دغې جبهې مشران وایي:« د دغې جبهې د جوړولو موخه په افغانستان کې د جمهوري نظام بیا ټینګول او د ملي ارزښتونو ساتنه ده.»
د افغانستان په سوېل کې د پخواني پوځ قوماندان سمیع سادات د دغې جبهې په پرانیست غونډه کې وویل:« د خپل هېواد د ازادۍ لپاره به ترهغه وخته جګړه کوو؛ چې افغانستان د ترهګرو له منګلو نه وي خلاص شوی.»
دغې جبهې په خپلې پرانیست غونډه کې پنځه ځانګړې موخې د غونډې ګډونوالو ته په ګوته کړې:
لومړی: د افغانستان اسلامي جمهوريت ټینګښت.
دویم: د افغانستان د ۲۰۰۲ کال د اساسي قانون بيا نافذول.
درېيم: د ملي بېرغ او ملي سرود په ګډون د ټولو ملي ارزښتونو بيا را ژوندي کول.
څلورم: ټاکنې، کورنی او نړۍوال مشروعيت، د بيان ازادي، د ښځو حقونو، د نړۍ سره غوره اړيکې او د بشر حقونو د بشپړ ټینګښت سره ټولو جمهوري انساني ارزښتونو ته ژمنتیا.
پنځم: افغانستان د نړۍوالو ترهګرو ډلو له شتونه پاکول
تر دې وړاندې هم یو شمېر افغان سیاستوالو له افغانستانه بهر یو شمېر خوځښتونه رامنځته کړي، چې د ځینو په اړه یې یو شمېر خلکو نېوکې هم لرلې دي؛ خو د دغه نوي رامنځته شوي خوځشت په اړه چې په سر کې یې پخواني جنرالان او پوځي څېرې لیدل کېږي تر اوسه کوم غبرګون مخې ته نه دی راغلی، وبه کتل شي چې په راتلونکې کې یې په اړه خلک څه وايي.
