د پاکستان د کورنیو چارو وزارت، افغانانو ته د څه باندې ۱۲ زره پاکستاني پاسپورټونو د صادرولو په اړه د څېړنو لپاره یوه کمېټه جوړه کړې ده. د پاکستانۍ رسنیو د راپورونو له مخې، دغه کمیټه کې به د « اېف ای اې» او د ملي ډيټابېس او نوملیکنې (نادرا) لوړپوړي افسران هم شامل وي.
کمیټې ته دنده سپارل شوې، چې په سیسټم کې نیمګړتیاوې او په دغو درغلیو کې ښکېل کسان معلوم کړي.
تمه کېږي، چې کميټه به د ۱۵ ورځو په اوږدو کې خپل راپور وړاندې کړي.
د درغلۍ خبر وروسته له هغې خپور شو، چې د سعودي عربستان چارواکو له افغانانو تر ۱۲۰۰۰ زیات پاکستاني پاسپورټونه ترلاسه کړل او د ریاض چارواکو هم په دې اړه اسلام اباد ته خبرداری ورکړ.
د پاکستان د کورنیو چارو وزارت دغه موضوع جدي نیولې او هوډ یې څرګند کړی، چې ژر تر ژره یې پای ته ورسوي.
د کمیټې ځېړنې به دا په ډاګه کړي، چې درغلۍ څنګه ترسره شوې او څوک په دغو درغلیو کې ښکېل دي.
