د کرېکټ نړیوال جام په ۳۲ سیالۍ کې نن نوي زیلنډ د سوېلي افریقا له ملي لوبډلې په لوی توپیر ماتې وخوړه. سوېلي افریقا ۳۵۷ منډې جوړې کړې وې، خو نوي زیلنډ یې په مقابل کې ایلا ۱۶۷ منډې وکړې. د هند په پونه ښار کې نوي زیلنډ د پچې ګټلو سره سوېلي افریقا ته د توپ وهلو بلنه ور کړه.
سویلي افریقا د پنځوسو اورونو په لوبولو او څلورو لوبغاړو په سوځېدو سره نوي زیلنډ ته د ۳۵۸ منډو هدف وټاکه.
خو د نوي زیلنډ ټول لوبغاړي تر ۳۵.۳ اور پورې وسوځېدل او ۱۶۷ منډې یې جوړې کړې او د ۱۹۰ منډو په توپیر سوېلي افریقا لوبه د ځان کړه.
په دې لوبه کې سوېلي افریقا د ۱۵ شپږیزو وهلو سره په روان جام کې د خپلو شپږیزو شمېر ۸۲ ورساوه او نوی ریکارډ یې جوړ کړ.
د سوېلي افریقا په لوبغاړو کې ویڼدر ډوسین د ۱۳۳ او ډي کاک د ۱۱۴ منډو جوړولو سره سلیزې وکړې او تر نورو ښه وځلېدل.
د کرېکټ نړیوال جام د اکټوبر پر پنځمه په هند کې پیل شوی او د نومبر تر ۱۹ به روان وي.
په دې جام کې د افغانستان، اسټرالیا، بنګله دېش، انګلنډ، هند، هالنډ، نيوزیلنډ، پاکستان، سوېلي افریقا او سریلانکا ملي لوبډلې ګډون لري.
