که څه هم چې د نومبر لومړۍ نېټه راورسېده؛ خو پرون پاکستانۍ رسنیو اعلان وکړ، چې د دغه هېواد په بېلابېلو سیمو کې به د ناقانونه کډوالو پر ضد عملیات سر له سبا یعنې د پنجشنبې په ورځ پیل شي.
نن هم په سلګونه کورنۍ تورخم ته رسېدلې او افغانستان ته د ستنېدو په حال کې دي.
د تورخم د فرضي کرښې څخه ځینو سرچینو افغانستان انټرنشنل ته وویل، چې دمګړۍ د تورخم په دروازه کې د خلکو ګڼه ګوڼه زیاته ده او ستنېدونکې کورنۍ غواړي، چې د هغوی د تېرېدو پړاوونه بشپړ او له دروازې تېرې شي.
پاکستان هغو افغان کډوالو ته، چې دوی یې ناقانونه بولي او شمېر یې ۱.۷ مېلیونه تنه ښودلی، د نننۍ ورځې تر پایه له پاکستانه په خپله خوښه د ستنېدو مهلت ټاکلی.
د پاکستان حکومت ادعا کړې، چې په تېرو دوو مياشتو کې له پاکستانه شاوخوا دوه لکه افغانان په خپله خوښه ستانه شوي دي.
له دې سره راپورونه وایي، چې پاکستاني حکومت اکثره دغه کډوال له بندي کولو، پر کورونو یې له چاپو اچولو او نورو ځورونو وروسته وتو ته اړ اېستي دي.
په پېښور کې د طالبانو کونسلګرۍ رسنیو ته ويلي، په تېره يوه میاشت کې یوازې په تورخم نږدې شل زره کورنۍ چې شمېر یې یو لک او شل زرو تنو ته رسېږي ستنې شوې دي.
د پاکستان د کورنيو چارو وزير سرفراز بګټي پرون یوې خبري غونډې ته ويلي، هغه ناقانونه کډوال چې له ټاکل شوي ضرب الاجل وروسته پاتې کېږي هم به نیول کېږی او هم به په زوره شړل کېږي.
هغه دا هم ویلي، چې د ناقانونه کډوالو تر څنګ هغه کډوال چې د پاکستان مهاجر کارتونه لري، هم په بېلابېلو پړاوونو کې خپل هېواد ته استول کېږي؛ خو نوموړي د دغو پړاوونو په اړه نور جزییات نه و ورکړي، چې کله به پیلیږي.
پاکستان په وروستيو کې څو ځله تور پورې کړی و، چې د پاکستان په بېلابېلو برخو کې افغانان په ترهګریزو کړنو کې ښکېل دي؛ خو په افغانستان کې واکمنو طالبانو دغه تور رد کړی او د پښتون ژغورنې غورځنګ مشر منظور پښتین په خپلې وروستۍ مرکه کې ویلي، چې ټول ترهګریز بریدونه د پاکستان د پوځ په سلا مشوره ترسره کېږي او د ټولو ترهګرو ډلو روزونکی او جوړونکی په خپله د پاکستان پوځ دی.
په ټوله کې ګڼو نړۍوالو بنسټونو خبرداری ورکړی، چې د افغان کډوالو اېستنه کېدای شي په افغانستان کې پراخه بشري ناورین ته لاره هواره کړي او هغه کسان چې د طالبانو له وېرې راکډه شوي ښايي د هغوی ژوند له ستر خطر سره مخامخ شي.
