د طالبانو سترې محکمې په یوې خبرپاڼې کې له نړۍوالې محکمې وغوښتل، چې په فلسطین کې د ترسره شویو ظلمونو په برخه کې دې بېړنی او جدي اقدام وکړي. په خبرپاڼه کې راغلي، چې د طالبانو ستره محکمه د اسراییل وروستۍ کړنې غندي او د دوی دغه کړنې په بشپړ ډول وحشت او له بشري حقونو سرغړونه ده.
د طالبانو سترې محکمې نن یکشنبه د ( لړم په ۱۴ مه ) په یوه خبرپاڼه کې لیکلي، چې اسراییل د نړۍوالو قوانینو خلاف د غزې په اوسېدونکو هر ډول لومړني خوراکي توکي، اوبه، درمل، برېښنا او د ژوند نور ضرورتونه بند کړي، چې دغه کار د غزې او نورو سیمو مسلمانان له ډېرو سختو مشکلاتو سره مخ کړي دي.
د خبر پاڼې په پای کې د طالبانو د سترې محکمې د رییس او قاضي القضات عبدالحکیم حقاني نوم لیکل شوی.
خبرپاڼه زیاتوي، چې د اسراییل له خوا په ډېره بې رحمۍ هوايي او ځمکني بریدونه روان دي، چې له امله یې زرګونه فلسطیني ښځې، ماشومان او لویان په "شهادت" رسېدلي، زیات شمېر یې ټپیان دي، روغتونونه، جوماتونه او کورونه یې نړېدلي دي.
په خبرپاڼه کې راغلي، چې دوی د فلسطین له ولس څخه ملاتړ اعلانوي او له ټولو اسلامي هېوادونو څخه غواړي، چې د فلسطینیانو لاس نیوی وکړي او په دې "امتحان" کې بې تفاوته پاته نه شي.
له دې وړاندې د طالبانو د بهرنیو چارو وزارت ویاند عبدالقهار بلخي د اسراییل له خوا د غزې پر تړانګه د اوبو او خوړو قطع کول او د ماشومانو او ښځو په شمول د ملکي خلکو وژل د بشریت ضد جرم بللی او له نړۍوالې ټولنې، سازمانونو او اسلامي هېوادونو یې غوښتي چې د دې ناورین مخه دې ونیسي.
