د طالبانو ویاند د پاکستان د موقت لومړي وزیر د ادعاو په غبرګون ویلي؛ څه ډول چې دوی په افغانستان کې سوله او امن غواړي په پاکستان کې یې هم غواړي. ذبیح الله مجاهد زیاته کړې، چې طالبان په پاکستان کې دننه د امنیت د ټینګولو مسوولیت نه لري.
مجاهد د چهارشنبې په ورځ (د لړم ۱۸مه) پر اېکس ټولنیزې شبکې د اعلامیې په خپرولو سره د پاکستان د موقت وزیر انوارالحق کاکړ د ادعاو پر وړاندې غبرګون ښودلی او ویلي یې دي؛ لکه څه ډول چې دوی په افغانستان کې امن او سوله غواړي په پاکستان کې هم سوله او امن غواړي.
انوارالحق کاکړ د چهارشنبې په ورځ په اسلام اباد کې یوه خبرې کنفرانس کې وویل:« په پاکستان کې د نا امنیو په خپرولو کې بې اسناده کډوال شامل دي، ترهګرو د پاکستان پر ضد د جګړې اعلان کړی، ترهګر د افغانستان له خاورې کار اخلي، د ترهګرو په اړه مو له افغانستان سره معلومات شریک کړي؛ خو افغانستان یې پر ضد هېڅ ګام نه دی پورته کړی».
طالبانو په یوې اعلامیې کې زیاته کړې، چې طالبان هیچاته اجازه نه ورکوي، چې د افغانستان خاوره د پاکستان په ضد استعمال کړي.
اعلامیه کې راغلي، چې پاکستان باید خپل کورني مسایل په خپله حل کړي او د خپلو ناکامیو ملامتي دی افغانستان ته نه راجع کوي.
اعلامیه کې ویل شوي: «دا چې د طالبانو له بریا څخه وروسته په پاکستان کې نا امني زیاته شوې، د دې دلیل نه شي کېدی چې ګنې موږ به د پاکستان د ناامنیو تر شا یو».
همداراز؛ د پاکستان سرپرست لومړی وزیر له افغانستانه غوښتنه کړې، چې په افغانستان کې مېشت پاکستاني وسلهوال دوی ته وسپاري.
طالبانو په اعلامیه کې دا هم ویلي، چې په افغانستان کې وسلې محفوظې دي، د هیچا لاسته نه دي ورغلي، د وسلو قاچاق ممنوع دی او د هر ډول غیر قانوني اقداماتو مخه نیول شوې ده.
د اعلامیې په وروستۍ برخه کې طالبانو لیکلي، چې افغانستان د یوه ورور او ګاونډ هېواد په شان له پاکستان سره د ښو اړیکو غوښتنونکی دی او پاکستان دې دا درک کړي، چې افغانستان د نورو هېوادونو په چارو کې مداخله او د هغو پر ضد اقدامات کول نه غواړي.
پاکستاني چارواکو تل ادعا کړې چې د پاکستان په ناامنیو کې افغانان ښکیل دي؛ خو طالب چارواکو بیا دغه ادعاوې رد کړي دي.
