د چک ولسوالۍ د برېښنا بند او فابرېکې د بیارغونې چارې پیل شوې
په میدان وردک ولایت کې د ۱۵۰ مېلیونه افغانیو په ارزښت د چک ولسوالۍ د برېښنا بند او فابرېکې د بیا رغونې چارې پیل شوې.
په میدان وردک ولایت کې د ۱۵۰ مېلیونه افغانیو په ارزښت د چک ولسوالۍ د برېښنا بند او فابرېکې د بیا رغونې چارې پیل شوې.
د میدان وردک ولایت د رسنیز مرکز د راپور له مخې، د دغه بند د بیا رغونې د پرانېستو په مراسمو کې د برېښنا شرکت د پروګرامونو یو تن طالب چارواکي ویلي چې، د دغه بند او فابرېکې رغنیزې چارې د سږ کال لپاره د ۱۵۰ مېلیونه افغانیو په ارزښت پیل شوې او په راتلوونکي کال کې ورته ۳۵۰ مېلیونه نورې افغانۍ په پام کې نیول شوې دي.د راپور له مخې، د دغه بند د بیارغونې چارې به د ۱۸ میاشتو په موده کې بشپړې شي.د طالبانو تر واک لاندې برېښنا شرکت د پروګرامونو مشر زیاته کړې چې، د دغه بند د کار له بشپړېدو سره به ۴ زره کورنۍ د برېښنا له خدمتونو برخمنې او په کال کزې به ۱۰۰ مېلیونه افغانۍ عواید ولري.د چک ولسوالۍ د برېښنا بند او فابرېکې د بیا رغونې د پرانېستې په مراسمو کې د طالبانو د اوبو او انرژۍ وزیر عبدالطیف منصور د خپلو خبرو پر مهال وویل چې، د دې بند چارې د دغه ولایت د اوسېدونکو په غوښتنه پیل شوې دي.
د طالبانو تبلیغاتي ډله د افغانستان د پخواني حکومت د چارواکو په څېر د قوش تپې کانال د «افغانستان د خلکو د ژغورنې لپاره د حکومت تر ټولو مهمه پروژه» بولي.
خو، مخالفان یې اندېښنه ښيي چې ښایي د قوش تېپې شاوخوا ځمکه «د طالبانو کورنیو» ته ووېشل شي او ځايي خلک اجباري کوچ ته اړ شي، خو طالبان دا ادعاوې ردوي.
له افغانستانه بهر ګاونډي هېوادونه هم په دې اړه چوپه خوله نه دي پاتي.
د ازبکستان ولسمشر په وږي میاشت کې خبرداری ورکړ چې د قوش تېپې کانال جوړول په منځنۍ اسیا کې د اوبو رژیم او توازن په بنسټیز ډول بدلولی شي.
خو د قوش تېپې کیسه له کومه ځایه پیل شوه؟
د قوش تېپې کانال په افغانستان او سیمه کې د اوبو د انتقال یو ستر کانال دی چې د بلخ ولایت له کلدار ولسوالۍ پیل شوی دی.
د قوش تېپې کانال پروژه د محمد داوود خان د واکمنۍ پر مهال د ١٣٥٢ او ١٣٥٧ کلونو ترمنځ طرحه شوې وه، خو د جګړې او بې ثباتۍ له امله پلې نه شوه.
د قوش تېپې کانال ته بهېدونکی امو سیند د پامیر له غرونو سرچینه اخلي او شاوخوا ۱۱۲۶ کیلومتره په اوږدوالي له تاجکستان، ازبکستان او ترکمنستان سره د افغانستان د شمالي پولو په اوږدو کې بهیږي.
امو سیند د منځنۍ اسیا یو له ډېرو اوبو لرونکو سیندونو څخه دی.
امو د نړیوال سیند په ټوګه، د افغانستان او د هغه د څلورو شمالي ګاونډيو هېوادونو تر منځ د ګډې طبیعي پولې په ټوګه پیژندل شوی او د افغانستان او دغو هېوادونو ترمنځ ځمکنۍ پوله ګڼل کیږي.
د طالبانو د لومړي وزیر مرستیال ملا برادر، د ۱۴۰۱ لمریز کال د وري په لسمه نېټه په بلخ ولایت کې د دغې ډلې د لوړپوړو چارواکو په ګډون د قوش تېپې کانال پرانیست.
هغه وویل چې د دغه کانال بشپړیدل به د افغانستان اقتصادي وضعیت ښه کړي او افغانستان به پر ځان بسیاینې ته نږدې کړي.
د احمد مسعود په مشرۍ د افغانستان د ملي مقاومت جبهې د دغو ادعاوو په غبرګون کې ویلي چې طالبان د قوش تېپې کانال شاوخوا ځمکې پاکستاني وګړو ته ویشي.
خو طالبانو تراوسه دا ځمکې د کانال شاوخوا پر ځايي خلکو هم نه دي وېشلې.
له بلې خوا، کله چې طالبان د افغانستان د زیربناوو د بیارغونې خبره کوي، منتقدین هغو بریدونو ته اشاره کوي چې دغې ډلې د ۲۰۰۱ او ۲۰۲۱ کلونو تر منځ د زیربناوو د جوړولو د مخنیوي لپاره پلان کړي وو.
