د کابل شهزاده سرای د افغانیو پر وړاندې د ډالرو د بیې د بې سارې ټیټېدو خبر ورکړ
د افغانیو پر وړاندې د ډالرو د بیې له راټیټېدو سره سم د کابل په شهزاده سراى کې صرافانو د پنجشنبې په ورځ د (لړم ۱۸مه) وویل چې، د پلازمینې په بازارونو کې د یوه امریکایي ډالر بیه اویا افغانیو ته ټیټه شوې ده.
د راپورونو پر بنسټ په تېرو دوو کلونو کې دا لومړی ځل دی، چې د افغانیو پر وړاندې د ډالرو ارزښت تر دې اندازې راټیټ شوی دی.
د جمهوري نظام له ړنګېدو وروسته د افغانیو پر وړاندې د ډالر بیه ډېره لوړه شوې وه، ان یو ډالر په ۱۱۷ افغانیو بدلېده؛ خو افغانستان ته د ډالرو د فزيکي کڅوړو له راتګ سره د ډالرو پر وړاندې د افغانیو بيه پیاوړې شوه.
د طالبانو تر واک لاندې د افغانستان بانک وخت په وخت د افغانیو د ارزښت ساتلو په موخه له ۱۰ تر ۱۴ مېلیونو ډالرو کڅوړې په لیلام پلوري او د ډالرو دغه کڅوړې په صرافانو پلورل کېږي.
د امریکا متحده ایالات له افغانستانه تر وتلو وروسته له دغه هېواد سره تر ټولو ستر تمویلوونکی پاتې شوی دی.
د افغانستان د بیارغونې لپاره د امریکا د ځانګړي سرمفتش ادارې (سیګار) د یوه راپور په خپرولو سره وویل چې، امریکا د طالبانو په دوره کې تراوسه افغانستان ته ۲.۱ مېلیارد ډالره ورکړي دي.
که څه هم په افغاني مارکېټ کې د ډالرو د ارزښت کمېدل له اقتصادي پلوه د خلکو په ګټه تمامېږي؛ خو دغه اقتصادي پرمختګ يو شمېر خلکو ته چې ډالر يې لرل زيانونه هم اړولي دي.
محسن چې د کابل په شهرنو کې درې پوړیزه کور لري وایي، چې له تېرو څو کلونو راهیسې ټول عاید یې د خپل کور په کرایه ورکولو ترلاسه کول؛ خو د جمهوري نظام له ړنګېدو وروسته د کورونو او هټیو د کرایو په راټیټېدو سره دی هم اړ شو ،چې د خپل کور کرایه راټیټه کړي.
د نوموړي په خبره، سره له دې چې د کور کرایه یې دوه برابره کمه کړې هم وه؛ خو اوس د ډالرو د بیو په کمېدو سره نور هم زیانمنېږي.
دا په داسې حال کې ده، چې یو شمېر نور هیوادوال بیا وايي، د ډالرو د بیې له راټیټېدو سره د تېلو او نورو سون توکو بیې سره له دې چې راټیټې شوې نه دي؛ بلکې لوړې شوې هم دي.
دوی له طالبانو غواړي چې، د خلکو اقتصادي وضعیت او د ډالرو د بیې ټیټوالي ته په کتو سره د خوراکي توکو بیې هم کنټرول کړي.