د پاکستان د بلوچستان صوبې د اطلاعاتو وزیر وايي، په دغه هېواد کې د ټولو افغان کډوالو اېستلو ته هم مهالوېش ټاکل کېږي. جان محمد اڅکزي د جمعې په ورځ په کوټه کې خبری ناستې ته وویل، چې دا مهالوېش به په راتلونکو شپږو اونیو کې اعلان شي.
پاکستان د تېر اکتوبر لومړیو کې کې بې اسناده کډوالو ته د یوې میاشتې لپاره وخت ور کړ او تر هغه وروسته هم د دې کډوالو د ستنولو لړۍ روانه ده.
پاکستان وايي، تراوسه له درې لکو ۱۷ زرو ډېر کډوال افغانستان ته ستانه شوي دی.
جان محمد اڅکزي دا هم وویل، چې تر جنورۍ پورې به ټول بې اسناده کډوال افغانستان ته ستنوي او له هغه وروسته به د قانوني کډوالو د ستنولو وخت ټاکي.
پاکستان افغان کډوال د دغه هېواد په تاوتریخوالي کې په لاس لرلو تورنوي، خو طالبان د پاکستان دا تورونه ردوي.
پر طالبانو سربېره د نړۍ مختلفو ادارو له پاکستان بیا بیا غوښتي چې د افغان کډوالو د ستنولو پرېکړه واخلي، خو پاکستان وايي، له خپل پلان شاتګ نه کوي.
د پاکستان یو شمېر عالمانو د دغه هېواد د پوځ له لوی درستیز عاصم منیر سره په کتنه کې د افغان مهاجرینو د ایستلو ملاتړ وکړ. دوی د "افغانستان له خاورې څخه د ترهګرو د نه خپریدو" په اړه د پاکستان د دریځ ملاتړ وکړ او له طالبانو یې وغوښتل چې د امنیتي اندیښنو د حل لپاره اقدام وکړي.
د پاکستان د بهرنیو چارو وزارت د پنجشنبې په ورځ ـ لړم ۲۵مه - اعلان وکړ چې اسلام اباد داسې معلومات لري چې ښيي د تحریک طالبان پاکستان غړي په دغه هېواد کې له ځینو "غیر قانوني کډوالو" سره په تماس کې دي.
د دغه وزارت ویاندې زهرا ممتاز بلوڅ ویلي چې د تحریک طالبان پاکستان وسله وال په افغانستان کې پټنځي لري.
د پاکستان د پوځ لوی درستیز د پاکستان له عالمانو وغوښتل چې د سخت دریځو او افراطي ترهګرو ډلو د غلطو تبلیغاتو د له منځه وړلو لپاره اقدام وکړی او د کورنیو اختلافاتو د مخنیوی لپاره اقدام وکړی.
د پاکستان ځینې دیني عالمانو په داسې حال د افغان کډوالو د ایستلو د پلان ملاتړ کړی چې د پاکستان د جمعیت علمای اسلام مشر پر دغه پلان نیوکه کړې ده.
هغه تېره اوونۍ وويل، چې د پاکستان حکومت په افغانستان او پاکستان کې له "ناخوالو" څخه ناخوښه دى او د دې نارضايتۍ بوج د افغان کډوالو په اوږو دی.
پاکستاني چارواکو ویلي دي چې د طالبانو له واک ته رسیدو وروسته په پاکستان کې تاوتریخوالی ۶۰ سلنه او ځانمرګي بریدونه ۵۰ سلنه زیات شوي دي.
پاکستان د سلګونو زرو افغان وګړو د ایستلو په اړه د خپل هیواد د اقدام په توجیه کې وویل چې دا اقدام د هغو وسلوالو په مقابل کې د طالبانو د نه ځواب په غبرګون کې دی چې له افغان خاورې په پاکستان کې بریدونه کوي.
د سوېلي پښتونخوا چمن پرلت وهونکو د ملاتړ په موخه د چمن ښار زرګونه ماشومانو د جمعې په ورځ د پرلت په ملاتړ راوتلي وو. د دغو ماشومانو عمرونه د شپږو او ۱۲ کلونو تر منځ وو او تور بېرغونه یې له ځانه سره لېږدول.
د پاکستان حکومت له لورې د سپین بولدک - چمن پر دروازه په پاسپورټ تګ راتګ د پرېکړي په غبرګون کې لسګونه زره کسانو د تېرو ۲۹ ورځو راهیسې پرلت وهلی دی.
د پاکستان دغې پرېکړې او پرلت له امله د سوېلي پښتونخوا د اوسېدونکو کاروبار په ټپه درېدلی دی.
دغو ماشومانو هم د سپین بولدک -چمن پر دروازه د افغانستان او پاکستان تر منځ په پاسپورټ د تګ راتګ په غبرګون کې د پاکستان پر ضد شعارونه ورکول.
په چمن کې قومي مشر خدای میر خان وايي:« په پاکستان کې د پنجاب د ماشومانو لپاره قانون او حقوق شته؛ خو د افسوس ځای دی چې زموږ د ماشومانو لپاره هیڅ حقوق نه شته، زموږ ماشومان د خپلو مشرانو په ملاتړ راوتلي دي او غواړي نړۍ ته وښیي چې پاکستان زموږ سره دوه مخیتوب کوي.»
لاریون کوونکي وايي، په سولهییز ډول یې خپل د حق تر لاسه کولو لپاره پرلت او لاریونونه وکړل؛ خو که غوښتنې یې و نه منل شي دا به یې وروستی پرلت وي او تر دې وروسته به لويې لارې بندې کړي.
د چمن د لغړي اتحاد مشر غوث الله وايي:« زموږ غږ نه اورېدل کېږي، د دغو ماشومانو غږ دې واورېدل شي. که موږ اړ شو نو همدا ماشومان به بیا تاسو په کاڼو ولي او په تشدد به لاس پورې کوي. پر موږ د چا پلار هم پاسپورټ نه شي منلی. موږ د پاکستان لوړ پوړو چارواکو ته خبرداری ورکوو، که دوی زور لري نو را دې شي دوی دې پر موږ پاسپورټ ومني دوی هیڅ دا کار نه شي کولای.»
د چمن د پرلت په ملاتړ د ماشومانو د لاریون تر څنګ، نن د پښتون ژغورنې غورځنګ زرګونو غړو د چمن څخه تر کوټې د چمن پرلت په ملاتړ او له پاکستانه په زوره د افغان کډوالو د اېستلو په غبرګون پلې تګ کوي.
دغه کسان وايي، شمېر یې زرګونه تنه دی او د اعتراض په ډول له چمن څخه تر کوټې پلې تګ کوي.
د افغان کډوالو یوه ډله د یونان او ترکیې تر منځ اوبو کې د دواړو هېوادونو د سمندري ساتونکو د «بد چلند او تاوتریخوالي» سره مخامخ شوې ده.
له دغې ډلې یو تن کډوال افغانستان انټرنشنل ته وویل: «یوناني پولیسو زموږ له نیولو وروسته زموږ ګرځنده ټیلیفونونه هم را ځینې واخیستل او له بېړۍ یې ماشین و اېست او موږ یې په اوبو کې خوشې کړو.»
دغه کډوال چې شمېر یې ۴۹ تنه وو وايي، چې هغوی د نومبر په نهمه نېټه د ترکیې د بدروم له سیمې څخه په یوې بادي بېړۍ کې د یونان د کالیمنوس ټاپو پر لور وخوځېده.
د دغو کډوالو په وینا، هغوی درې ساعته په اوبو کې مزل کړی و چې د یونان د سمندري ساتونکو سره مخامخ شول.
له دغو کډوالو له ډلې یو یې وویل، کله چې د یونان سمندری ساتونکو هغو وپېژندل ورپسې شول او پر هغوی یې ډزې وکړې.
هغه زیاته کړه: «له ډېرې وېرې او ترهې وروسته اړ شو، چې خپله بېړۍ ودروو .»
دغه کډوال وايي، د یونان سمندري ساتونکو د دوی ګرځنده تیلیفونونه ترې واخیستل او د هغوی له بېړۍ څخه یې ماشین و اېست او دوی یې په اوبو کې خوشې کړل.
د دغه کډوال په خبره، هغوی په اوبو کې له څلور ساعته لالهاندۍ وروسته دا پلا د ترکیې د سمندري ساتونکو لاس ته ورغلل.
هغه وویل، ترکي پولیسو هغوی اووه ورځې په کمپ کې وساتل چې په دې موده کې له هغوی سره «له تاوتریخوالي او سپکاوي» ډک چلند وشو.
د دې تر څنګ دغه کډوال وايي، چې د ترکیې په کمپ کې هغوی ته یوازې یو وخت «وچه ډوډۍ » په پام کې وه او پولیسو له هغوی پیسې هم اخیستې وې.»
دمګړۍ دغو کډوالو ته «د بېرته ستنولو» پاڼې ورکړل شوي او د ترکیې د یوه هوايي ډګر په ترمینال کې خوشې شوي دي.
په تېرو اونیو کې ترکي رسنیو د لسګونه افغان کډوالو د نیولو خبرونه خپاره کړي و.
ترکي رسنیو د پنجشنبې په ورځ، د (لړم په ۲۵مه) راپور ورکړ، چې د دغه هېواد سمندري ساتونکو د چاناک قلعه کې ۴۹ تنه افغان کډوال چې له یونانه راشړل شوي وو، ژغورلي دي.
د دغه راپور له مخې، د دغو کډوالو بېړۍ د یونان د سمندري ساتونکو لهخوا د ترکیې لورې ته د اېواجېک سمندر خوا ته شړل شوي وو.
ترکیې په دې وروستیو کې د افغان کډوالو نیونې ته زور ورکړی او دغه هېواد ته د کډوالو د ننوتلو او وتلو پر وړاندې یې کوټلي ګامونه پورته کړي دی.
دغه هېواد اروپايي هېوادونو ته د رسېدو لپاره د افغان کډوالو غوره لاره ګڼل کېږي، چې د طالبانو له بیا واکمنۍ وروسته د افغانانو ستره څپه د ترکیې پر لور راماته شوې ده.
د روغتیا نړۍوال سازمان وایي؛ تمه کیږي چې د پاکستان د حکومت د وروستي بې اسناده کډوالو د ایستلو پلان په پایله کې به شاوخوا ۱.۳ میلیونه افغان کډوال په زور یا په رضا افغانستان ته ستانه شي.
د دغو ګڼ شمېر کډوالو راستنېدل د نورو عواملو تر څنګ، د عامې روغتیا د پام وړ اندېښنې را پارولي؛ په ځانګړې توګه د ننوتلو په مختلفو ځایونو کې د پولیو د ویروس د لېږد خطر شتون لري.
د روغتیا نړۍوال سازمان وایي، چې د ۷۰۰ زرو افغان راستنېدونکو روغتیایي پاملرنې ته د لاسرسي لپاره یې په یوه مفصل پلان کار کړی، چې دغو روغتیایي اړتیاو د پوره کولو لپاره ۱۰ میلیونه امریکایي ډالرو ته اړتیا ده.
د روغتیا نړۍوال سازمان زیاتوي: «د ساري ناروغیو لوړ خطر، د بې ځایه کېدو ، په کمپونو کې د لنډمهاله ځای په ځای کېدو ، د ژوند خراب شرایط ، موجوده روغتیایي ستونزې ، خوارځواکي ، فزیکي او رواني فشار (په ځانګړي توګه د ډېر عمر لرونکو خلکو او میندواره مېرمنو ترمنځ)، ناامني ، له سختې سړې هوا سره مخ کېدل او په ټولیزه توګه روغتیایی خدمتونو ته د لاسرسي نشتوالی، دا عاملونه کولې شي چې په کمزورې روغتیا او ټولنیز اقتصادي سیسټمونو فشار راوړي، چې دا په راستنیدونکو کډوالو او کوربه ټولنو دواړو باندې ناسمه اغیزه کوي».
د اړینو درملو په کافي اندازه نه شتون دا ننګونې نورې هم پیچلې کوي. راستنیدونکي کډوال د اوږدمهالو ناروغیو؛ لکه شکر او لوړ فشار سره مخ دي.
د روغتیا نړۍوال سازمان خبرداری ورکړی، چې روغتیایي خدماتو ته په ځانګړې توګه د ساري ناروغیو، د مور او ماشوم روغتیایي خدماتو او د میندوارۍ بېړنۍ پاملرنې په برخه کې د محدود لاسرسي له امله د ناروغۍ او مړینې د کچې د زیاتوالي احتمال هم شته.
د دغه بېړني وضعیت د اداره کولو لپاره د روغتیایي خدماتو چمتو کوونکو ظرفیت کې تشه شته.
د ملګرو ملتونو په چوکاټ کې د روغتیا نړۍوال سازمان د روغتیا په برخه کې د یوې مخکښې ادارې په توګه په فعاله توګه د ژوند ژغورنې، لومړني روغتیایي خدمتونو، اړین درمل او اکمالي خدمتونه وړاندې کوي.
په افغانستان کې د روغتیا د نړۍوال سازمان استازي ډاکټر لوو ډاپینګ وویل: "لکه څنګه چې موږ افغانانو ته خپل هېواد ته د بیرته راتګ ښه راغلاست وایو، دا د عامې روغتیا په برخه کې زموږ ټولیز مکلفیت دی چې ډاډ ترلاسه کړو چې موږ د عامې روغتیا د خطرونو د مخنیوي، چمتووالي او ځواب ویلو لپاره سیستمونه او سرچینې لرو. موږ دلته یو؛ تر څو ډاډ ترلاسه کړو چې موږ کولې شو د هر چا روغتیایي اړتیاو ته په ځانګړې توګه د مېرمنو، ماشومانو، د ډېرو عمر لرونکو خلکو او نورو زیان منونکو خلکو پاملرنه کولې شو".
د روغتیا نړۍوال سازمان افغانستان ته د ننوتلو په لویو پولو ننګرهار، کندهار او هرات ولایتونو کې خپل ټیمونه ځای پر ځای کړي دي.
دغه ټیمونه به د ۲۰۰۵ میلادي کال د نړۍوال روغتیایي مقرراتو په اساس دغو راستنیدونکو ته روغتیایي خدمات وړاندې کړي.
د روغتیا نړۍوال سازمان په ملاتړ به په سپین بولدک کې (۳۰ بستره) او په تورخم کې (۲۰ بستره) روغتونونه د دوو اونیو په اوږدو ک فعال شي.
د روغتیا نړۍوال سازمان په پام کې لري، چې په ۳ سترو سرحدي سیمو کې موقتي مرکزونه جوړ کړي، چې دا مرکزونه به لومړني روغتیایي خدمتونه او د غیر ساري ناروغیو په شمول د شکر، لوړ فشار، شري او پولیو لپاره ملاتړ چمتو کړي.
یو شمېر افغان کډوالو افغانستان انټرنشنل - پښتو ته وویل، چې دوی مجبور دي، چې د کورونو وسایل او ځینې وسایط په نیمه بیه وپلوري او په خپله بېرته افغانستان ته لاړ شي. د زړو وسایلو او وسایطو اخیستونکي بیا وايي، چې د کډوالو په تګ سره د وسایطو او وسایلو په نرخونو کې کموالی راغلی دی.
۵۳ کلن حاجي نواب جان چې تازه یې د پېښور د زړو توکو د خرڅلاو په بازار کې د خپل کور یو شمېر وسایل پلورلي؛ افغانستان انټرنشنل - پښتو ته وویل، چې د خپل کور وسایل یې له نیمايي په کمې بیې وپلورل.
هغه وویل: "ایرکنډېشن، کولرې، کوچونه او ډېر شیان چې ما به پرې له دوه لکو ډېرې کلدارې ورکړې وې نن مې په ۴۷ زره کلدارې خرڅ کړل".
هغه وویل، چې ځینې وسایل په افغانستان کې د استفادې وړ نه وو، ځکه دوی په پلرني ټاټوبي کې د برېښنا اسناتیاوې نه لري.
رحیم جان چې تازه له تورخمه را اوښتی او دا مهال د کډوالو په مېشت غالي کې اوسي؛ افغانستان انټرنشنل - پښتو ته وویل، چې دوه اونۍ وړاندې یې خپل کرولا موټر په نیمه بیه وپلوره.
نوموړی زیاتوي، چې له پولیسو سره اتلس ورځې بندي و او له زندانه یې خپل ورور ته احوال ولیږه، چې موټر خرڅ کړي او افغانستان ته د تګ تابیا ونیسي.
هغه وویل: "موږ مجبور وو، څه مو کړی وی؟ ما دا کرولا موټر په ۱۴ لکه کلدارې اخیستی و او ورور مې بېرته په ۸ لکه خرڅ کړ".
رحیم جان وايي، چې د کور ځینې وسایل یې هم یو شمېر ګاونډیانو ته مفت ورکړي دي.
عادل خان چې د پېښور د زړو توکو د خرڅلاو په بازار کې دوکان لري؛ افغانستان انټرنشنل - پښتو ته وویل، چې د افغان کډوالو د بېرته تګ له اعلان سره هره ورځ لسګونه کسان د خپلو کورونو د زړو وسایلو د پلور لپاره راځي.
هغه وویل: " اوس اکثره دوکانداران ځینې سامانونه نه اخلي؛ ځکه موږ یې اخلو خو بېرته داسې څوک نشته چې پرې خرڅ یې کړو".
د عادل په خبره؛ چې د توقع خلاف د کورونو برقي او زینتي وسایل بازار ته راغلي دي.
بل خوا نوید افریدي چې په کارخانو مارکیټ کې د موټرونو د خرڅلاو کاروبار کوي وايي، چې د کډوالو په بېرته ستنېدو سره د موټرونو د خرڅلاو بازار هم خراب شوی دی.
هغه وویل، چې ګڼ افغانان بېرته خپل موترونه خرڅوي، چې له امله یې په نرخونو کې ټیټوالی راغلی دی.
افریدي زیاته کړه: "دلته خو ډېرو مهاجرو موټرې لرلې اوس یې بېرته خرڅوي او د ټول بازار قیمتونه یې راښکته کړل".
په ورته وخت کې د ملګرو ملتونو د بشري چارو د همغږۍ د دفتر مشر د سې شنبې په ورځ اعلان وکړ، چې په دوو میاشتو کې څه باندې ۳۲۷ زره افغان کډوال له پاکستان څخه افغانستان ته راستانه شوي دي.
ډانیال انډرس د راستنو شويو کسانو حالت کړکېچن وباله او ويې ويل، چې افغانستان ته د راستنېدونکو زياتره يې سرپناه نه لري.
هغه چې د تورخم پولې ته د کډوالو د وضعیت د کتلو لپاره تللی و؛ له هغه ځایه یې عکسونه خپاره کړل او ویې ویل: زه له پاکستانه د زرګونو افغانانو د راستنېدو شاهد یم: "د دوی ډېری په خورا بد حالت کې دي".
په افغانستان کې د ملګرو ملتونو د بشري مرستو همغږي کوونکي زیاته کړه، چې له ډېرو کډوالو سره یې خبرې کړې دي.
هغه زیاته کړه، چې اکثره راستانه شوي کسان په افغانستان کې کور نه لري.