د امریکا پخواني ولسمشر ډونلډ ټرمپ ویلي، که د ۲۰۲۴ کال ټاکنې وګټي، له طالبانو سره د خبرو له لارې به د بګرام هوايي اډه یو ځل بیا کنټرول کړي. ښاغلي ټرمپ ویلي چې د کابل په شمال کې دغې ستراتیژیکې اډې ته ستنېدلو سره چین څاري.
د ډیلي میل د راپور له مخې ښاغلي ټرمپ دا موضوع د شنبې په ورځ (۲۷ ) په ایوا کې په یوه کنفرانس کې راپورته کړه.
له طالبانو سره د دوحې تړون د ښاغلي ټرمپ د ولسمشرۍ پر مهال لاسلیک شو، چې له افغانستانه د امریکايي ځواکونو وتلو ته یې لاره هواره کړه، خو نوموړي په تېرو دوو کلونو کې څو ځلې ټینګار کړی، چې امریکا باید د بګرام هوايي ډګر وساتي.
د متحده ایالاتو پخواني ولسمشر وویل چې بګرام اډه له هغه ځای څخه یو ساعت لرې ده چې چین خپل اټومي توغندي جوړوي او "اوس د دوی لخوا اشغال شوې ده."
ښاغلي ټرمپ ټینګار وکړ چې "موږ غوښتل چې د بګرام ساتنه وکړو"، زیاته یې کړه چې اوس نه غواړي د دې هوايي اډې کنټرول سره په افغانستان کې پوځي حضور ولري، بلکې غواړي چې پر چین نظر وساتي.
ښاغلي ټرمپ د بګرام هوايي اډې ستراتیژیک موقعیت ته په اشارې سره وویل: «دا هوايي اډه هغه ځای ته نږدې پرته ده چې چین خپل توغندي جوړوي. اوس پوه شوئ چې چا قبضه کړې ده؟ چین."
په ۲۰۲۱ کال کې له افغانستان څخه د بهرنیو ځواکونو تر وتلو مخکې، د بګرام هوايي ډګر په افغانستان کې د امریکا تر ټولو ستره پوځي اډه وه.
