د طالبانو د اطلاعاتو او کلتور مرستیال وزیر سن پیټرزبورګ ته د سفر په ترڅ کې له روسیې وغوښتل چې د افغانستان د تاریخي ځایونو د بیارغونې په برخه کې له دغې ډلې سره مرسته وکړي.
حيات الله مهاجر فراهي چې روسيې ته د خپل سفر په ترڅ کې د سن پيټرزبورګ په نهمه فرهنګي غونډه کې ګډون وکړ ویلي یې دي چې په افغانستان کې د تېرو جګړو او وروستيو زلزلو له امله تاريخي ځایونه زيانمن شوي دي.
نوموړي د شنبې په ورځ (د لړم ۲۷) ددې غونډې په څنډه کې ټاس خبري اژانس ته ویلي: «له روسیې سره مو خبرې روانې دي چې معلومه کړو، دغه هېواد څنګه کولای شي له افغانستان سره د جګړو پر مهال د له لاسه وتليو تاریخي اثار په بیارغونه کې مرسته وکړي.»
حيات الله مهاجر فراهي زياته کړه چې موږ غواړو د روسيې د فرهنګ له وزير سره هم ووينو او په دې اړه نور تفصيلي خبرې وکړو.
د افغانستان د فرهنګي ميراثونو د ساتنې مسله د طالبانو تر واکمنۍ وروسته د فرهنګيانو او يونېسکو له مهمو انديښنو څخه ده.
د ملګرو ملتونو علمي او فرهنګي سازمان (یونېسکو) له طالبانو غوښتي چې د افغانستان د کلتوري میراثونو ساتنه وکړي.
طالبان چې د بامیانو د بودا مجسمې او نور لرغوني اثار له منځه وړي، اعلان کړی چې د افغانستان د فرهنګي میراثونو ساتنه به کوي.
له دې سره، د هېواد په بېلابېلو سيمو کې د افغانستان د کلتوري ميراثونو پر وړاندې د طالبانو د غیر حرفوي کيندنو او شکمن چلند ګڼ راپورونه خپاره شوي دي.
د روان کال د تلې په میاشت کې په بامیانو ولایت کې یو شمېر سرچینو افغانستان انټرنیشنل ته ویلي و چې لسګونه طالب جنګیالیو د پنجاب ولسوالۍ په لویدیځ کې کلیوال بندیان کړي او د تاریخي اثارو د لټولو لپاره یې په خپلسري ډول دوو قبرونه کیندلي دي.
د سرچینو په وینا، طالبانو د "سید مقبره" په نوم یو زیارت او د "پاچا د لور" په نوم یو قبر کیندلي دي.