د ترکیې حکومت اعلان کړی، چې ۸۲۶ افغان کډوال یې د استوګنې له رسمي اسنادو پرته له هېواده ایستلي دي. دغه پناه غوښتونکي له نيول کېدو وروسته په څلورو الوتنو کې بېرته افغانستان ته ستانه کړل شول. ترکیې ویلي دي، چې د بې اسنادو کډوالو د ایستلو بهیر ته به دوام ورکړي.
تر دې مخکې د ترکیې حکومت اعلان کړی و، چې د روان کال په لومړیو شپږو میاشتو کې یې د دغه هېواد له بېلابېلو ښارونو څخه ۴۲۶۸۵ کډوال چې د اوسېدو رسمي اسناد یې نه لرل نیولي او بېرته افغانستان ته لېږلي دي.
ترکیه د هغو زرګونو افغان کډوالو د مهاجرت یوه له اصلي لارو څخه ده چې اروپا ته د رسېدو په هیله له افغانستان څخه د بشري حقونو د پراخو سرغړونو، ظلم او بې وزلۍ له امله تښتي.
د دغه وزارت د مالي او اداري چارو مرستیال محمد ارسلان خروټي د ایټالیاوئ موسسې له مشرې سوسانا فیورټي سره په لېدنه کې افغان ستنېدونکو کډوالو سره د یادې موسسې د مرستو د ستاینې ترڅنګ وویل چې نړیوالې مرستندویه ادارې باید د افغانستان اوسنیو سختو شرایطو ته په کتو سره خپلې مرستې زیاتې کړي.
ښاغلي خروټي په خپلو خبرو کې زیاته کړې ده چې، له کډوالو باید سیاسي استفاده و نه شي او له دوی سره یې پر انساني چلند ټینګار کړی.
د یادولو ده چې میرمن فیورټي هم په جبري توګه له اېستل شویو کډوالو سره د دغې موسسې د مرستو د دوام ډاډ ورکړ.
افغان کډوال په دې وروستیو کې د ایران او پاکستان په ګډون له یو شمیر ګاونډیو هیوادونو څخه په داسې حال کې اېستل کیږي چې له یوې خوا افغانستان له سخت اقتصادي ناورین سره مخ دی او له بلې خوا د ژمي په رارسېدو سره زرګونه ستانه کړای شوي کډوال بې کوره شوي.
د راپورونو له مخې، یو شمیر هیوادوال شکایت لري چې د نړیوالو مرستې دوی ته په سمه توګه نه رسیږي.
ځینې ویډیوګانې چې افغانستان انټرنشنل ته رسیدلې دي ښیي چې یا مرسته شوي توکي په بازارونو کې خرڅیږي او یا هم هغو کسانو ته ورکول کیږي چې طالبان وي او یا له طالبانو سره نږدې اړیکې ولري.
