د لبنان حزب الله ډلې د اسراییل پر شمال تر ۵۰ زیات راکټونه توغولي دي
د لبنان حزب الله ډلې د پنجشنبې په ورځ (د لیندۍ دویمه) د اسراییل په شمال کې پر پرتو پوځي اډو څه باندې ۵۰ توغندي توغولي دي.
د لبنان حزب الله ډلې د پنجشنبې په ورځ (د لیندۍ دویمه) د اسراییل په شمال کې پر پرتو پوځي اډو څه باندې ۵۰ توغندي توغولي دي.
دغه راکټي بریدونه پرون د لبنان په جنوب کې د اسراییل د هوایي بمبار په ځواب کې شوي، چې ویل کیږي د حزب الله پنځه جګپوړي جنګیالي پکې وژل شوي وو.
د اسوشیېټډ پرېس خبري اژانس په وینا؛ د پنجشنبې ورځې راکټي بریدونه په تېره یوه نیمه میاشت کې د اسراییل په شمال کې د حزب الله له خوا تر ټولو سخت بریدونه بلل شوي دي.
په دې موده کې په سرحدي سیمو کې د اسراییلي پوځ او د لبنان د حزب الله تر منځ نېږدې هره ورځ نښتې شوې دي.
حزب الله چې د ایران له خوا یې ملاتړ کیږی، اعلان کړی چې له اسراییل سره پر پوله په خپلو اقداماتو سره توانېدلي چې پر غزې د اسراییل د پوځ فشار راکم کړي.
پر غزه د اسراییل هوايي، ځمکني او سمندري بریدونو تر ۱۳۰۰۰ ډېر کسان وژلي او پراخې سیمې یې ویجاړې کړې دي.
