د روغتیا د نړۍوال سازمان ویانده په غزه کې د ماشومانو په منځ کې د ساري ناروغیو او د نس ناستي د زیاتوالي په اړه خبرداری ورکړ او ویې ویل، که په غزه کې روغتیايي سیستم سم نه شي؛ ښايي لا زیات کسان له دې ناروغۍ مړه شي.
مارګارت هرېس ټینګار وکړ، چې ساري ناروغیو د چاودنو په پرتله ډېر خلک وژلی شي.
د روغتیا د نړۍوال سازمان ویاندې مارګارت هرېس د سې شنبې په ورځ (د لیندۍ په ۷مه) په جیوا کې په غزه کې د نويو زېږېدلو فلسطیني ماشومانو کې د ساري ناروغیو په ځانګړې توګه د اسهال د زیاتوالي په اړه خپله اندېښنه څرګنده کړه.
هغې وويل، چې د نومبر تر لومړيو پورې د پنځو کالو څخه کم عمره او تر هغه پورته ماشومانو کې دا ناروغۍ د عادي کچې څخه سل چنده زياته شوې دي.
د روغتیا د نړۍوال سازمان ویاندې زیاته کړه، چې د غزې خلک د خوړو او اوبو له کمښت سره مخ دي.
د اسراییل او حماس ترمنځ د موقتي اوربند د موافقې له مخې؛ د اوبو، خوراکي توکو او درملو په ګډون نورو بشري مرستو ته غزې ته د ننوتلو اجازه ورکړل شوې ده.
مرستندويه ادارې وايي، چې دغه مرستې د اړتياو د پوره کولو لپاره کافي نه دي.
د غزې روغتیايي چارواکو ویلي دي، چې پر سیمه باندې د اسراییل د بریدونو په پایله کې تر ۱۵ زره زیات کسان وژل شوي چې ۴۰ سلنه یې ماشومان دي.
