د تاجکستان ولسمشر امام علي رحمان د نړیوال بانک له رییس اجي بانګا سره په کتنه کې د برېښنا د انتقال لپاره د کاسا ۱۰۰۰ زر پروژې د دوام غوښتنه وکړه. کاسا ۱۰۰۰ په منځنۍ اسیا کې د برېښنا د لېږد یوه ستره پروژو ده چې د افغانستان له لارې له منځنۍ اسیا تر پاکستانه انرژي رسوي.
کاسا-۱۰۰۰ پروژه په ۲۰۱۶ کال کې د تاجکستان، افغانستان، قرغزستان او پاکستان د لوړ پوړو چارواکو په حضور کې پرانیستل شوه.
دا پروژه به د تاجکستان او قرغزستان برېښنا د افغانستان له لارې پاکستان ته انتقال کړي.
خو د تاجکستان حکومت د ١٤٠١ کال په نيمايي کې اعلان وکړ چې په افغانستان کې د امنيتي وضعيت له امله په افغانستان کې د کاسا-١٠٠٠ برېښنا پروژې کار ودرول شو.
د تاجکستان د برښنا پروژې د دفتر مشر فیضعلی سمیعوف د ۱۴۰۱ کال په نیمایي کې رویټرز ته وویل چې د دې پروژې کار چې ټاکل شوې وه راتلونکی کال بشپړ شي، له افغانستان پرته په دریو نورو هېوادونو کې هم دوام لري.
د مرکزي-جنوبي اسیا د برېښنا د سوداګرۍ او لېږد پروژې لګښت، چې عموماً د کاسا ۱۰۰۰ په نوم یادېږي، ۱.۱۷ میلیارده ډالره اټکل شوی دی.
دغه پیسې نړیوال بانک، د اسیا بانک، اسلامي پراختیایي بانک، امریکا او بریتانیا ورکوي.
دا پروژه د منځنۍ اسیا له هېوادونو جنوبي اسیا ته د برېښنا د لېږد لپاره طرحه شوې ده.
د تاجکستان د خاور خبرې اژانس د راپور له مخې امام علي رحمان د نړیوال بانک له مشر سره په کتنه کې د کاسا-۱۰۰۰ بریښنا مزي د پروژې د بیا پیلولو په اړتیا ټینګار وکړ.
دا غونډه په دوبۍ کې د اقلیم د بدلون د ۲۸م کنفرانس په څنډه کې وشوه.
