د جمهوریت له ړنګېدو وروسته په ننګرهار کې د ختیځ ۱۰۰۰ بستریز روغتون چارې په ټپه ولاړې دي
افغانستان انټرنشنل ـ پښتو موندنې ښيي، چې د جمهوریت ړنګېدو راپه دې خوا په ننګرهار کې د ختیځ زر بستریز روغتون ودانۍ چارې په ټپه ولاړې دي. په ننګرهار کې یو شمېر د پخواني حکومت چارواکي وايي، چې د جمهوریت پر مهال د ختیځ زر بستریز روغتون اتیا سلنه کارونه ترسره شوي دي.
د طالبانو له واکمنۍ څخه شاوخوا دوه کاله تیریږي؛ خو د دې پروژې لپاره د بودېجې د نشتوالي له امله شل فیصده کارونه په ټپه ولاړ دي.
د طالبانو تر واک لاندې په ننګرهار د عامې روغتیا ریاست کې سرچینو افغانستان انټرنشنل - پښتو ته وویل، چې د ننګرهار روغتیايي خدمات یوازې د د دې ولایت د نفوس لپاره بسنه نه کوي؛ خو دغه ولایت د زون مرکز دی، بلکې د لغمان، کنړ او نورستان څخه هم ناروغان د درملنې لپاره دغه ولایت ته راځي.
دغه سرچینې زیاتوي؛ د طالبانو د واک لاندې مرکزي حکومت ته یې څو - څو وارې د ختیځ زر بستریز روغتون پاتې کارونو او د پرانیستلو لپاره مراجعه کړې ترڅو بودیجه ځانکړې شي او دغه روغتون پرانیستل شي؛ خو تر اوسه کوم مثبت ځواب نه دی ترلاسه شوی.
د ننګرهار عامې روغتیا روغتون ځیني ډاکتران وايي؛ په روغتون کې ځای نه لري او زیاتره وخت په یو کټ کې دوه ناروغان ځای پر ځای کوي او درملو نه شتون هغه لویه ستونزه ده، چې ناروغان او دوی ورسره مخامخ دي؛ خو دا ستونزې د ننګرهار په ولسوالیو کې څو برابره زیاتې دي.
د افغانستان انټرنشنل ته رارسېدلو معلوماتو له مخې؛ د ننګرهار د عامې روغتیا ریاست په یو کرايي کور کې فعالیت کوي.
د ختیځ زر بستریز روغتون کې د ننګرهار د عامې روغتیا ریاست پاره ودانۍ هم په پام کې نیول شوې ده.
د ختیځ ۱۰۰۰ ستریز روغتون د جلال اباد ښار شپږمې ناحیې کې په ۲۷۰ جریبه ځمکه کې پلان شوی دی.
دا لویه پروژه د تېر حکومت له خوا د جمهوري ریاست د ملي پراختیا د عملیاتي او ملاتړې ادارې په مالي ملاتړ، د ملي پراختیا شرکت د بنايي ودانیزې تصدۍ له خوا پرمخ وړل کېدله.
د ختيځ زر بستریز روغتون څخه تمې دا وې، چې دا روغتون به په نوي موډرن ډول او نوي پرمختللو طبي وسایلو سمبال وي او د ختیځ ولایتونو ناروغان به نور نه اړ کیږي؛ چې د سختو ستونزو سره پاکستان ته د درملنې لپاره لاړ شي.
هغه تمې چې اوس ختيځ میشتي له ناامیدۍ سره مخ کړي دي او د دې روغتون ساختماني چارې په ټپه ولاړې دي.
د تېر حکومت له ولسمشر څخه د هېواد د ختیځو ولایتونو د اوسېدونکو یوه لویه غوښتنه دا وه، چې د زون په کچه دې ختیځ زر بستیریز روغتون جوړ او پرانیستل شي.
دا د هغو خلکو غوښتنه وه، چې پخواني ولسمشر اشرف غني ته یې د ولسمشریزو ټاکنو په دوه دورو ډیرې رایې ورکړې وې.
په جلال اباد ښار کې د ختیځ زر بستریز روغتون بنسټ ډبره د پخواني ولسمشر محمد اشرف غني له خوا په ۲۰۱۸ کال کې کېښودل شوې وه.