د ایران د تایباد پوله ساتو ځواکونو په یوه باروړونکي موټر چې له افغانستانه ایران ته د ننوتو په حال کې و، په کې بار شاوخوا شل کیلوګرامه نشهيي توکي کشف او ترلاسه کړي دي.
د تايباد د سرحدي لوا قوماندان محمد محمودي د دغه موټر چلوونکى افغان وباله او ويې ويل، چې خپل موټر يې پرېښود او افغانستان ته وتښتېد.
نوموړي د ایران له اېرنا خبری اژانس سره په خبرو کې وویل:« د دوغارون د پولې د کنټرول او څارنې پوله ساتو ځواکونو دغه هېواد ته له افغانستانه یوه لارۍ ونیوله.»په دغه راپور کې چې د دوشنبې په ورځ د (لېندۍ ۱۳مه) خپور شو د محمد محمودي په حواله ليکل شوي، چې د پلټنې پر مهال نشهيي توکي په دغې لارۍ کې پټ شوي وو، لارۍ چلوونکی یې افغانستان ته وتښتېد.د تایباد د سرحدي کنډک د قوماندان په وينا، د پولې په صفري نقطه کې د طالبانو له استازو سره په همغږۍ د دغه افغان د نيولو هڅې د ګڼې ګوڼې له امله بې پایلې پاتې شوې او دغه موټر چلوونکی د پوله ساتو سرتېرو له سترګو پناه شو او وروسته وتښتېد.محمد محمودي وايي، د ایران پوله ساتو ځواکونو د لارۍ له کتلو او چک کولو وروسته د ښيښې په نوم د نشهيي توکو شل کڅوړې چې په مهارت سره په لارۍ کې ځای پرځای شوې وې، کشف او ترلاسه کړې.دا په داسې حال کې ده، چې د ایران د نشهیي توکو پر ضد د مبارزې د ادارې عمومي منشي تر دې مخکې د کوکنارو د کښت د کموالي په اړه د طالبانو ادعا رد کړې وه او ویلي یې و، چې احصایې په افغانستان کې د کوکنارو د کښت د زیاتوالي ښودنه کوي.سکندر مومني په افغانستان کې د صنعتي نشهيي توکو د تولید د پام وړ زیاتوالی د ایران او نړۍ لپاره یو جدي ګواښ وباله.
