باختر اژانس د کډوالو چارو وزارت له قوله ویلي چې د قندهار ولايت د سپين بولدک له لارې د ١٢٣ زرو ٩٧١ تنو په ګډون ٢٢ زره ٢٨٣ کورنۍ افغانستان ته ستنې شوې دي. دا اژانس زیاتوي چې دغه کډوال په تېره یوه نیمه میاشت کې افغانستان ته ستانه شوي دي.
د طالبانو د کنټرول لاندې باختر اژانس نن په دغه رپوټ کې ليکلي دي چې له پاکستان ستنو شويو کډوالو ته د خوراکي توکو، نغدو پيسو او د استوګنې د اړتيا وړ مرستې برابرې شوې دي.
د رايډيو پاکستان د تازه راپور له مخې، د استوګنې له اسنادو پرته د کډوالو د شړلو د پروسې له پيل راهيسې، نږدې نیم میلیون افغانان افغانستان ته ستانه شوي دي.
پاکستاني چارواکو ویلي دي چې له پاکستان څخه د بې اسناده کډوالو د اېستلو پروسه دوام لري.
