سراج الدین حقاني په پکتیا کې د ۱۵ میلیونه افغانیو په لګښت جومات پرانیست
د طالبانو کورنیو چارو وزارت د یکشنبې په ورځ ( لیندۍ ۱۹ مه) اعلان وکړ چې د پکتیا ولایت په شواک ولسوالۍ کې یې د ۱۵ میلیونه افغانیو په لګښت یو جومات جوړ کړی دی. دا جومات د طالبانو د کورنیو چارو وزیر سراج الدین حقاني پکتیا ولایت ته د سفر په ترڅ کې پرانیست.
د طالبانو کورنیو چارو وزارت په یوه خبرپاڼه کې لیکلي، چې دغه جومات د سراج الدین حقاني په امر او د یوه سوداګر په مالي مرسته جوړ شوی دی.
د دغه جومات د پرانېستې په مراسمو کې د طالبانو د کورنیو چارو وزیر دا د ودانیزو پروژو یوه برخه وګڼله او ویې ویل، چې طالبانو د جوماتونو په جوړولو سره وښوده، چې دوی د ورانولو په لټه کې نه دي، بلکې د جوړولو په لټه کې دي.
د طالبانو ډله په تیرو دوو لسیزو کې په پرله پسې ډول په جوماتونو په بریدونو تورنه شوې ده او په ځینو مواردو کې دغې ډلې د دغو بریدونو د تنظیمولو مسوولیت په غاړه اخیستی دی.
سراج الدین حقاني وویل چې د افغانستان په لویو لارو کې د جوماتونو د جوړولو لپاره د طالبانو پریکړه د ساختماني پروژو د پلي کیدو دوام دی.
د طالبانو کابینې سږ کال په خپله ۲۹مه غونډه کې د ټولګټو وزارت ته امر وکړ چې د لویو لارو په اوږدو کې په هر سل کیلومترۍ کې یو جومات جوړ کړي.
د طالبانو د چارو ادارې د سلواغې په ٩مه، په يوه خبرپاڼه کې ليکلي، چې د طالبانو کابينې دا امر هم کړى، چې د لويو لارو په اوږدو کې د تېلو د ټانکونو خاوندان دې د جوماتونو جوړولو ته وهڅول شي.
په تېرو دوو کلونو کې طالبانو د جوماتونو او دیني مدرسو پر جوړولو ډېرې پیسې لګولې دي.