د ملي امنیت پخوانی رییس وايي مولانا فضل الرحمان د افغانستان له تېر نظام میلیونونه ډالره په دې نامه اخیستي و چې ځینو طالب مشرانو ته یې د رشوت په توګه ورکوي ترڅو خبرو ته یې قانع کړي. رحمت الله نبیل دا خبره له هغه وروسته کړې چې طالبانو فضل الرحمان ته د افغانستان د سفر بلنه ورکړه.
د افغانستان د تېر جمهوري نظام د ملي امنیت رییس رحمت الله نبیل پرون په خپله اېکس پاڼه کې افغانستان ته د مولانا فضل الرحمان د بلنې په غبرګون کې لیکلي دي چې اوس مولانا فضل الرحمان غواړي د پاکستان له استخباراتي ادارو څخه په دې نامه پیسې ترلاسه کړي چې افغان طالب مشرانو ته رشوت ورکولو سره هغوی قانع کړي چې یا د ټي ټي پي مشران پاکستان ته وسپاري او یا هم دغه ډله خبرو اترو ته چمتو کړي.
نبیل زیاتوي « ملا له جومات نه پیسې غلا کوي، خو وايي چې دا د خدای دي »
رحمت الله نبیل په خپل ټویټ کې دا نه ده په ډاکه کړې چې دغه میلیونونه ډالره مولانا فضل الرحمان ته په تېر جمهوري نظام کې کوم واکمن ورکړي وو.
تېره ورځ د پاکستان جمعیت علما اسلام رسنیز دفتر په خپله اېکس پاڼه کې لیکلي و، په اسلام اباد کې د طالبانو سفیر سردار احمد شکیب د مولانا فضل الرحمان کور ته ورغلی او هغه ته یې افغانستان د سفر بلنه ورکړې ده.
دواړو په دغه لیدنه کې د سیمې او د افغانستان او پاکستان پر اړیکو خبرې کړې دي.
دوی ویلي چې د افغانستان او پاکستان ښې اړیکې په سیمه کې د امنیت ضامن دي.
څیړونکي په دې باور دي چې پاکستان استخباراتي ادارې په افغانستان کې د ځیني سیاسي او مذهبي ګوندونو مشران پر خپلو سیاسي موخو سربېره د پېغام وړونکي په توکه کاروي.
مولانا فضل الرحمان او ډله یې د پاکستان نظامي ادارو سره نژدې اړیکې لري.
تر اوسه د مولانا فضل الرحمان رسنیز خپرپاڼه کې نه ده روښانه کړې چې دغه سفر په کومه نېټه کېدونکی دی.
