د اسټرالیا بهرنیو چارو وزارت د شنبې په ورځ (د لیندۍ ۲۵مه) اعلان وکړ، چې له افغانستان سره یې ۲۰ میلیونه ډالره نوې بشري مرسته ځانګړې کړې ده. دغه وزارت ویلي چې له دې مرستو څخه به د افغانستان خلک او په ګاونډیو هیوادونو کې بې ځایه شوي افغانان ګټه پورته کړي.
د اسټرالیا بهرنیو چارو وزارت لخوا په خپره شوې خبرپاڼه کې ویل شوي چې نړۍ د ۱۱۴ میلیون څخه د زیاتو بې ځایه شویو کډوالو له لوی ناورین سره مخ ده، اسټرالیا هڅه کوي چې د بیا مېشتیدنې په نړیوالو هڅو کې مخکښ رول ولوبوي.
د خبرپاڼې له مخې، دغه هیواد د پناه غوښتنې مشورتي پینل رامینځته کړی چې هڅه کوي د اسټرالیا د اوسیدو د پروګرامونو په اړه غوښتونکو ته مشورې ورکړي.
تر دې وړاندې یوې اسټرالیايي رسنۍ راپور ورکړی و، چې دغه هېواد د افغانانو د بشري ویزې څه باندې ۵۰ زره غوښتنلیکونه رد کړي او ۱۴۴ زره غوښتنلیکونه پاتې دي.
دغې شبکې لیکلي چې له هغه راهیسې چې طالبان د ۱۴۰۰ لمریز کال د زمري په ۲۴ مه واک ته ورسېدل، شاوخوا ۲۰۸ زره افغانانو د دغې ډلې له ګواښ څخه د خلاصون لپاره د اسټرالیا ویزې غوښتې دي.
