هندي چارواکي وايي، د پاکستان له پولو هند ته پر نشهیي توکو د بار بې پیلوټه الوتکو له «بې مخینې ګواښونو» سره مخامخ یو. د پنجاب ایالت د پوله ساتو ځواکونو یوه چارواکي ګارډین ورځپاڼې ته ویلي، دغه بې پیلوټه الوتکې تر ډېره له «افغانستانه هیرویین او تریاک» لېږدوي.
د دوی په وینا، د دغو بې پیلوټه الوتکو لهخوا په چین کې جوړې شوې وسلې هم د هند په خاوره کې پرېښودل کېږي.
په راپور کې راغلي، په روان زېږدیز کال کې هندي چارواکو له پاکستانه د ۹۰ بې پیلوټکه الوتکو مخه نیولې چې په نشهيي توکو بار وې.دغه چارواکی وايي، د دغو الوتکو د نفوذ د رکود دغه ورکړل شوې شمېرې خورا لوړې دي چې هره میاشت په کې پام وړ زیاتوالی راځي.دوی وايي، دغه چاره د هند په پنجاب کې د نشهیي توکو کړکېچ ډېروي او امنیتي اندېښنې نورې هم زیاتېدای شي.دغه بې پیلوټه الوتکې د «هګزاکوپټر» په نوم یادې شوې، چې دوه نیم متره عرض لري او پر سر یې دوربینونه هم نصب شوي دي.
داسې راپورونه هم شته، چې دغه بې پیلوټه الوتکې په ۱۲ کیلو مترۍ کې د ننه د هند په خاوره کې لیدل شوې او پېژندل شوې دي.
په راپورونو کې دا هم راغلي، چې دغه بې پیلوټه الوتکې په کوچنیو کڅوړو او د کوکاکولا په بوتلونو کې نشهیي توکي لېږدوي.
د هند او پاکستان تر منځ د بېلابېلو توکو قاچاق په بېلابېلو بڼو ترسره کېږي؛ خو هندي چارواکو ویلي، چې لومړنۍ بې پیلوټه الوتکه په ۲۰۱۹ کال کې ولیدل شوه؛ خو نن سبا دغه ډول قاچاق د هند او پاکستان تر منځ عام شوی دی.
د هندي چارواکو په خبره، په تېرو څو اونیو کې یې له پنځو تر شپږو بې پیلوټه الوتکو مخه نیولې ده.
هندي چارواکي داسې مهال له افغانستانه هند ته د تریاکو او هېرویینو د قاچاقو خبره کوي، چې ملګرو ملتونو د لړم په میاشت کې ویلی وو په افغانستان کې د کوکنارو کر کېله ۹۵ سلنه کمه شوې ده.
