د حماس مشر: یرغمل شوي کسان به د اسراییل د یرغل له بشپړ بندېدو وروسته خوشې شي
د حماس د سیاسي دفتر مشر اسماعیل هنیه وایي، چې اسراییلي یرغمل شوي کسان به د اسراییل د یرغل د بشپړ بندېدو وروسته خوشې شي.
د حماس د سیاسي دفتر مشر اسماعیل هنیه وایي، چې اسراییلي یرغمل شوي کسان به د اسراییل د یرغل د بشپړ بندېدو وروسته خوشې شي.
نوموړي له رویټرز خبري اژانس سره په خبرو کې زیاته کړې، چې د اسراییلي یرغمل شویو خوشې کول یوازې هغه وخت ممکن دی چې "د مقاومت شرایط" پوره شي.
یاد خبري اژانس همداراز د هنیه له قوله لیکلي، چې د دوی شرایط د فلسطین د خلکو پر وړاندې د اسراییل د جګړو د بندیدو د برحقه غوښتنه ده.
د حماس د سیاسي دفتر مشر ټینګار وکړ، چې د دغې ډلې دریځ د قطر او مصر چارواکو ته مطرح شوی دی.
هنیه زیاته کړه، چې حماس د اردن سیند په لویدیځه غاړه او د غزې په تړانګه کې د یوه واحد فلسطیني دولت د جوړولو له پلان سره کومه ستونزه نه لري.
د اسراییل او حماس ترمنځ د پخوانۍ هوکړ،ې له مخې؛ د ۸۱ اسراییلیانو، ۲۳ ټایلنډي او یوه فلیپيني په ګډون ۱۰۵ یرغمل شوي کسان خوشې شوي دي.
که څه هم تر اوسه دقیق روښانه نه ده، چې د غزې په تړانګه کې د حماس او نورو فلسطیني ډلو له خوا د کومو هېوادونو وګړي یرغمل شوي؛ خو د خپرو شویو معلوماتو له مخې داسې ښکاري چې له اسراییل پرته د امریکا، ټایلنډ، ايټاليا، روسيې، فرانسې، هسپانيې، جرمني ارجنټاين او هالنډ وګړي د فلسطيني ډلو په اسارت کې دي.
