سعودي عربستان په اسپانیا کې یوه ښځه د سفیرې په توګه ټاکلې ده
سعودي گزت ورځپاڼې راپور ورکړی، چې هیفاء بنت عبد العزیز ال مقرن په اسپانیې کې د سعودي عربستان د نوې سفیرې په توګه ټاکل شوې ده.
سعودي گزت ورځپاڼې راپور ورکړی، چې هیفاء بنت عبد العزیز ال مقرن په اسپانیې کې د سعودي عربستان د نوې سفیرې په توګه ټاکل شوې ده.
د مېرمن ال مغرن ټاکل د سعودي عربستان د ولیعهد د هغو هڅو یوه برخه ده، چې د دغه هېواد د یوه عصري څېرې د وړاندې کولو او په سټېج کې د لا ډېرو ښځو د راوستلو په موخه ترسره کېږي.
مېرمن ال مقرن د سې شنبې په ورځ د سعودي عربستان د پاچا سلمان په حضور کې په هسپانیې کې د دغه هېواد د سفیرې په توګه لوړه وکړه.
سعودي عربستان د نوې ښځینه سفیرې تر ټاکلو مخکې پنځه نورې ښځې هم په خپلو سفارتي ماموریتونو کې د سفیرې په توګه ټاکلې وې.
دغه سفيرانې په امريکا، سويډن، اروپايي اتحاديې، فنلنډ او ناروې کې ټاکل شوې دي.
په وروستیو کلونو کې د سعودي عربستان پاچا د ښځو د پیاوړتیا او هغوی ته د لا زیاتو فرصتونو د ورکولو لپاره مهم ګامونه پورته کړي دي.
دا هڅې د سعودي ولیعهد محمد بن سلمان د نوې تګلارې یوه برخه ګڼل شوې، چې موخه یې په دغه اسلامي هېواد کې د ښځو د حیثیت لوړول او نړۍ ته د سعودي عربستان بېل انځور وړاندې کول دي.
محمد بن سلمان چې په اصل کې د سعودي عربستان اصلي واکمن ګڼل کېږي، غواړي تر ۲۰۳۰ کال پورې د دغه هېواد اقتصاد بدل کړي او د تېلو پر عایداتو تکیه کمه کړي.
