د اسراییل د دفاع وزیر په غزه کې د پوځي عملیاتو په دوام ټينګار وکړ. د اسراییل د دفاع وزیر یواو ګالانت د غزې د مرکزي لویې لارې د لیدو پر مهال په غزه کې د دغه هېواد د پوځي عملیاتو د بندولو خبرونه رد کړل.
ګالانت تر هغه وروسته دغه خبرې مطرح کړې، چې یو شمېر رسنیو مخکې ویلي وو، چې اسراییل له غزې تړانګې خپل یو شمېر پوځیان باسي.
نوموړي د غزې په سویلي برخه کې د جګړو په ستایلو سره زیاته کړه، چې اسراییلي پوځ په خان یونس کې د حماس د لوړ پوړو چارواکو په لټه کې دی.
ګالانت همداراز وویل، چې د اټکلونو له مخې د غزې تړانګې په شمال کې له ۱۵ څخه تر ۱۸ زره پورې د حماس وسله وال فعاله و او ډېری یې یا وژل شوي او یا هم د غزې سویل ته تښتیدلي دي.
دا په داسې حال کې ده، چې د نوي میلادي کال په پیل سره د غزې پر وړاندې د اسراییل بریدونو زور اخیستی او د الجزیرې خبري شبکې د فلسطین د روغتیا وزارت په حواله ویلي دي، چې د تېرې میاشتې له ۱۵ نېټې راهیسې په غزه کې ۲۲ زره ۱۸۵ تنه وژل شوي او لږ تر لږه ۵۷ زره نور ټپیان شوي دي.
د دغه راپور له مخې؛ یوازې په تېرو ۲۴ ساعتونو کې ۲۰۷ کسان وژل شوي او ۳۳۸ نور ټپیان دي.
د اسراییلي چارواکو په خبره؛ حماس د غزې له اوسېدونکو څخه د انساني سپر په توګه کار اخلي او ملکي ځایونه لکه؛ کمپونه، ښوونځي، روغتونونه او جوماتونه د خپلو ترهګریزو موخو لپاره کاروي.
