د شمالي وزيرستان په ميرعلي سيمه کې د ماين په چاودنه کې درې ماشومان وژل شوي دي. ځایي پولیس وایي، دغه ماشومان شپانه وو او د کجورې پوستې ته څېرمه په کروندو کې د څارويو د څرولو پرمهال پر دوی ماین وچاودېد او درې واړه په کې ووژل شول.
د پولیسو په وینا، د دغو درېیو ماشومانو عمرونه له پنځو تر پنځلس کالو وو.
تېره ورځ هم په میرعلي بازار کې یو پولیس وژل شوی و.
ورته مهال، د خيبرپښتونخوا د کرمې ایجنسۍ په جهنډرې سيمه کې په یوې جلا پېښه کې پر یوه موټر د ډزو له امله يو تن وژل شوى دى.
دا په تېرو لسو ورځو کې د دغې ولسوالۍ د سني او شیعه مذهبو سیمو ترمنځ په لویه لاره د ډزو درېیمه پېښه ده، چې ترسره کېږي.
