د امریکا بهرنیو چارو وزارت ویاند په کرمان کې د قاسم سلیماني د تلین په مراسمو کې چاودنو ته په اشارې سره وویل چې امریکا په دغو چاودنو کې هیڅ رول نه لري. متیو میلر زیاته کړه چې امریکا هیڅ دلیل نه لري چې ومني، په دغو چاودنو کې دې اسراییل لاس ولري.
د امریکا بهرنیو چارو وزارت ویاند ویلي چې په دغو بریدونو کې د اسراییل د لاس لرلو په اړه هیڅ شواهد نه شته.
نوموړي د چهارشنبې په ورځ «د مرغومي ۱۳مه» په یوه خبري کنفرانس کې په سیمه کې د کړکېچ د زیاتېدو او د ایران د غچ اخیستونکو ګامونو په اړه د افغانستان انټرنشنل مرضیې حسیني پوښتنې ته په ځواب کې وويل: «هر هغه هیواد چې غواړي له سیمه ییز تاوتریخوالي ناسمه ګټه پورته کړي باید په خپله پرېکړه له سره غور وکړي.»
هغه زیاته کړه چې نه د امریکا حکومت او نه هم اسراییل د ایران په تازه بریدونو کې لاس لري، خو امریکا د دغې پېښې د قربانیانو له کورنیو سره خپله خواخوږي څرګندوي.
د ایراني چارواکو د معلوماتو له مخې د چهارشنبې په ورځ (د مرغومي ۱۳مه) د ایران په کرمان ښار کې په دوو خونړیو چاودنو کې لږ تر لږه ۹۵ تنه ووژل شول او ۲۱۱ تنه نور ټپیان شول.
رسنیو د کرمان په چاودنه کې د ۱۰۳ کسانو د وژلو خبر ورکړی و، خو د ایران روغتیا وزیر بهرام عین اللهي ویلي چې د وژل شویو کسانو شمېر ۹۵ تنه دی.
هغه زیاته کړه: «د مړو شمېر ځکه لوړ ښودل شوی وو چې د ځینو نومونه په تېروتنه دوه ځلې ثبت شوي وو.»
دغه چاودنې د ایران د سپاه پاسداران د قدس ځواکونو د پخواني قوماندان قاسم سلیماني د مړینې د څلورم تلین په مراسمو شوې دي.
تر اوسه پورې کومې ډلې په کرمان کې د چاودنو مسوولیت نه دی منلی. ایران په دغو بریدونو کې اسراییل په لاس لرلو تورن کړی، خو دغه هېواد دغه تور رد کړی دی.
تر دې وړاندې داعش په ایران کې په څو ترهګریزو بریدونو بریالی شوی و.
