اروپايي ټولنې د یوې اعلامیې په خپرولو سره د قدس ځواکونو د پخواني قوماندان قاسم سلیماني قبر ته څېرمه چاودنې «ترهګریزې» پېښې بللې او په کلکه یې غندلې دي. دغې ټولنې د دې پېښو د قربانیانو له کورنیو سره خواخوږي څرګنده کړه او زیاته یې کړه چې د دغو بریدونو له عاملانو سره باید حساب وشي.
په داسې حال کې چې رسنیو د کرمان په چاودنه کې د ۱۰۳ کسانو د وژلو خبر ورکړی و، خو د ایران روغتیا وزیر بهرام عین اللهي ویلي چې د وژل شویو کسانو شمېر ۹۵ تنه دی.
هغه زیاته کړه: «د مړو شمېر ځکه لوړ ښودل شوی وو چې د ځینو نومونه په تېروتنه دوه ځلې ثبت شوي وو.»
نوموړي د ټپيانو شمېر ۲۱۱ تنه اعلان کړ.
دغه چاودنې د چهارشنبې په ورځ (د مرغومي ۱۳ مه) د قاسم سلیمانی قبر «ګلزار شهدای کرمان» ته څېرمه شوې دي.
تر اوسه پورې کومې ډلې په کرمان کې د چاودنو مسوولیت نه دی منلی. ایران په دې برید کې اسراییل په لاس لرلو تورن کړی، خو دغه هېواد دغه تور رد کړی دی.
بل لوري ته د امریکا بهرنیو چارو وزارت ویاند په کرمان کې د قاسم سلیماني د تلین په مراسمو کې چاودنو ته په اشارې سره ویلي، چې امریکا په دې چاودنو کې هیڅ رول نه لري.
متیو میلر زیاته کړه چې امریکا هیڅ دلیل نه لري چې ومني، په دغو چاودنو کې دې اسراییل لاس ولري.
تر دې وړاندې داعش په ایران کې په څو ترهګریزو بریدونو بریالی شوی و.
