د بهرنیو چارو پخواني وزیر د رحمت الله نبیل وروستیو څرګندونو ته توند غبرګون ښودلی او هغه یې بې بنسټه بللي. هغه په اېکس پاڼه لیکلي:« د امو ټلویزیون سره په مرکه کې د ښاغلي نبیل تورونه بې بنسټه، درواغجن او له شرمه ډک دي.»
نوموړي زیاته کړې:« دغسې کوم څه نه دي پېښ شوي، دا یوازې د هغه په ذهن کې جوړ شوي درواغ دي.»
هغه ویلي:« سمو اطلاعاتو ته د خلکو لاسرسی یو مهم اصل دی، چې ان په سیاسي سیالیو او رقابتونو کې هم باید رعایت شي.»هغه د خپلې لیکنې په وروستۍ برخه کې لیکلي:« ښاغلی نبیل د دغه اصل په رعایت کې ښه مخینه نه لري او په تېر کې هم دې ته اړ شو، چې د هېواد حیاتي مسلو په اړه د خپلو ناسمو اطلاعاتو په اړه د رسنیو له لارې له خلکو بخښنه وغواړي. د درواغجنو اطلاعاتو خپرول نه یوازې دا چې سیاسي لویوالی چاته نه ورکوي، د هېواد په اوسنیو شرایطو کې هم د ستونزو په حل کې مرسته نه شي کولای.»تر دې وړاندې ښاغلي نبیل یوې رسنۍ سره د مرکې پر مهال حنیف اتمر تورن کړ او ویې ویل:« هغه مهال چې ښاغلی اتمر د ملي امنیت شورا سلاکار و د حامد ګیلاني سره یو ځای هڅه کوله چې له انس حقاني سره وویني، چې زه ورسره همغږی نه وم. له هغه وروسته چې انس حقاني د بګرام زندان ته ولېږدول شو، ښاغلی اتمر د ځینو پاکستاني کړیو سره یو ځای هلته ورغی او له انس سره یې بیا لېدنې کتنې لرلې.»تر دې وړاندې ښاغلي نبیل یوې رسنۍ سره د مرکې پر مهال حنیف اتمر تورن کړ، چې یو تن چې د پاکستان د استخباراتو سره په تړاو نیول شوی و، د هغه مهال د ملی امنیت د شورا د سلاکار حنیف اتمر په سپارښتنه له بنده خوشې شوی و؛ خو ښاغلي اتمر په خپل غبرګون کې دغه تورونه درواغجن او بې بنسټه وبلل.
