سرچیني وايي، نن دوشنبه سهار (د مرغومي ۱۸مه) د خیبر پښتونخوا د باجوړ ماموند سیمه کې د پولیسو پر یوه ګاډي د ماین چاودنې په پېښه کې څلور پولیس وژل شوي او ۱۴ نور ټپیان دي. ويل کیږي برید د پولیسو پر هغه ګاډي شوی چې د ګوزڼ ضد واکسیناتورانو امنیت یې ساته.
پاکستاني رسنۍ وايي، دغه برید پر هغو پولیس شوی چې د باجوړ په ماموند سیمه کې یې د ګوزڼ ضد واکسیناتورانو امنیت یې ساته.
سرچیني وايي، د پيښې ځای ته د ژغورنې ډلې او ګڼ پولیس رسېدلي او ویل کیږي چې د یو شمېر ټپي شویو پولیسو روغتیايي حالت د اندېښنې وړ دی.
تر دې مهاله د یاد برید مسوولیت کومې وسله والې ډلې په غاړه نه ده اخیسی.
د پاکستان د خیبر پښتونخوا په باجوړ کې یاد برید داسې مهال کیږي چې تېره ورځ د دغه هیواد د جمیعت علمای اسلام ګوند مشر مولانا فضل الرحمن د افغانستان او پاکستان تر منځ د اړیکو د جوړېدو په موخه کابل ته رسیدلی.
واک ته د طالبانو تر رسیدو وروسته د پاکستان امنيتي حالت تر پخوا ترینګلی شوی او په دغه هیواد کې پر پاکستاني پوځ او پولیسو بریدونه تر پخوا ډیر شوي دي.
دویم تعقیب:
د دغې پیښې د خبر له خپریدو یو ساعت وروسته د خیبر پښتونخوا پولیسو په یاده پیښه کې د وژل شویو پولیسو شمېر پنځه تنه او د پولیسو په ګډون د ټپیانو شمېر ۲۲ تنه ښودلی دی.
