سي این این راپور ورکړی، چې د فرانسې ولسمشر ایمانویل میکرون د سې شنبې په ورځ (د جدي ۱۹مه ) ۳۴ کلن ګابرېیل اتال د هېواد د لومړي وزیر په توګه وټاکه. ښاغلی اتال له ۱۹۵۸ کال راهیسې د فرانسې تر ټولو ځوان لومړی وزیر دی.
ایمانویل مکرون پر خپلې ایکس پاڼې لیکلي: "ګرانه ګابرېیل اتال، زه پوهېږم چې زه کولی شم د فرانسې خلکو ته د خدمت کولو لپاره ستاسو په انرژي او ژمنتیا حساب کړم."
سي این این راپور ورکړی، چې ګابرېیل اتال په فرانسه کې لومړی په ښکاره همجنسباز سړی دی، چې د هېواد دويم ځواکمن سیاستوال په توګه دنده ترسره کوي.
ګابرېیل اتال د ایمانویل میکرون متحد او د فرانسې د رینسیس ګوند غړی دی. هغه تر دې مخکې د فرانسې د پوهنې د وزیر په توګه کار کړی دی.
تر ګابرېیل اتال مخکې د فرانسې لومړۍ وزیره الیزابت بورن وه، چې د ایمانویل مکرون په رضایت یې استعفاء وکړه.
