سرچینې وايي نن سهار د پاکستان پنجاب ایالت د راولپنډۍ په خیابان سرسعید سیمه کې دوه افغانې کډوالې د نامعلومو کسانو له لوري په چاړه وهل شوې او ټپیانې دي. ويل کیږي دواړه ټپي شوې افغانې مېرمنې روغتون ته لیږدول شوې او روغتیايي حالت یې د اندېښنې وړ نه دی.
تر اوسه پورې لا د پېښې انګیزه نه ده معلومه چې ولې دغه افغانې میرمنې په چاړه ټپیانې شوې دي خو میاشت وړاندې د پاکستان پلازمېنه اسلام اباد په پيښور موړ سیمه کې یو افغان کډوال د غلو له لوري په ډزو ووژل شو.
سرچینې وايي دواړو مېرمنو په لاسونو د چړې ګوزارونه لیدلي دي.
تر اوسه پورې په سیمه کې پولیسو په دې اړه څه نه دي ويلي، خو په اسلام اباد کې د پمز په نوم روغتون ډاکتران وايي چې د دواړو ټپي شویو مېرمنو روغتیایي حالت ښه دی.
غوښتل مو چې په دې اړه خپله له داوړو ټپي شویو افغان مېرمنو سره خبرې وکړو خو هغوی د ځينو امنیتي دلیلونو له مخې و نه غوښتل چې په دې اړه نظر ورکړي.
د افغانستان د ولسي جرګې پخوانۍ غړې شکریه بارکزۍ وايي، طالبان غواړي په زوره د افغانستان پر مېرمنو څادري وتپي چې دا «نه د افغاني فرهنګ سره اړخ لګوي او نه هم د اسلامي شریعت سره برابره ده.»
هغې زیاته کړه، څادري یا برقع «د طالبانو په لاس جوړ شوی څیز دی» چې د ځانمرګو بریدونو پر مهال یې په سرولې.
د افغانستان د پخوانیو امنیتي ځواکونو او بهرنیانو سره د طالبانو د جګړې په کلونو کې، د دغې ډلې ګڼ بریدګر له څادریو سره نیول شوي وو، چې په انځوریزو رسنیو کې یې انخورونه هم خپاره شوي وو.
داسې ښکاري، چې مېرمن بارکزۍ هم همدغو انځورونو ته اشاره کوي.
شکریې بارکزۍ، د افغانستان پر ښخو د څادریو د په سر کولو په اړه وویل، د [اسلام] په دین کې د «جبر و اکراه» په نوم داسې څه نه شته.
د افغانستان د ولسي جرګې دغې پخوانۍ غړې د افغانستان انټرنشنل سره په خبرو کې طالبان یوه «ورانکاره» ډله یاده کړه، چې «دین، انسانیت و انساني حقونو» ته درناوی نه کوي.
هغې وویل، چې طالبانو د ښځو پر تعلیم او پر هغو د نورو بندیزونو لګولو په تړاو «سل شفاهي او لیکلي فرمانونه»صادر کړي؛ خو «د اقتصادي او امنیتي وضعیت د ښه والي له پاره یې لس فرمانه» نه دي صادر کړي.
شکریې بارکزۍ زیاته کړه، چې د افغانستان مېرمنې هیڅکله هم «بې حجابه» نه وې؛ خو طالبان د[هغوی د ځپلو له پاره] پلمې جوړوي.
مېرمن بارکزۍ د خپلو خبرو په یوه برخه کې وویل، تر هغې چې نړۍواله ټولنه طالبانو ته «پیسې ورکوي» او له دغې ډلې سره جوړ جاړی کوي؛ نو طالبان به له مېرمنو څخه د فشار د وسیلې په توګه کار اخلي.
طالبانو د خپلې واکمنۍ په څه نا څه دوه نیمو کالو کې پر ښځو پراخه بندیزونه لګولي او په دې وروستیو کې یې د کابل په ځینو سیمو کې د هغوی د نیولو او بندیانولو لړۍ هم پیل کړې ده.
په وروستیو ورځو کې د کابل په دشت برچي، ټایمني او خیرخانه مینه کې د ښځو او نجونو د ډلهییزې نیونې ګڼ خبرونه خپاره شوي دي.
خو تازه طالب ویاند ذبیح الله مجاهد طلوعنیوز ته ویلي: «دغه نیونې د هغې ډلې د تنبه کولو پر ضد شوي، چې غوښتل یې بې حجابي دود کړي او دا لنډمهاله چاره ده.»
تر دې وړاندې د امر باالمعروف وزارت یو ویاند بيبيسي ته منلې وه، چې دغه وزارت یو شمېر مېرمنې د کابل په لویدیځ کې د «بې حجابۍ» په تور نېولې وې؛ خو دغه وزارت دا نه و ویلي، چې د دغو نیول شویو مېرمنو شمېر څومره و.
یوې زدهکوونکې د یکشنبې په ورځ په یوې ویډیو کې چې افغانستان انټرنشنل ته یې استولې، ویلي دي چې د هغې ۱۹ کلنه خور طالبانو نیولې او نامعلوم ځای ته یې وړې ده.
تر دې وړاندې د طالبانو د امر بالمعروف او نهی عن المنکر داسې انځور او سپارښتنې خپرې کړې وې، چې د دوی د خوښې حجاب په کې معرفي شوی و.
په دغو انځورونه او سپارښتنو کې داسې ښکاري، چې مېرمنې باید د طالبانو په خوښه حجاب کې ټول بدن راونغاړي چې نه یې مخ ښکاره شي، نه یې پښې او نه هم لاسونه.
تر دې وړاندې هم د طالبانو لهخوا د افغانستان پر ښځو د حجاب په سرولو او له هغوی سره د زور زیاتي د کارولو پر سر د افغانستان ګڼو خلکو او ټولنو غبرګونونه په ډاګه کړي وو.
د پاکستان د مشرانو جرګې پخوانی سناتور او پښتون سیاستوال افراسیاب خټک د طالبانو او پاکستان تر منځ راټوکېدلی کړکېچ غولوونکې لوبه بولي او زیاتوي، چې دوی په خپلو کې سره بشپړ یووالی او اتفاق لري.
افراسیاب خټک تېره شپه افغانستان انټرنشنل ته په یو بحث کې ویلي، پاکستان د دغې لوبې په ترسره کولو سره غواړي طالبانو ته یو خپلواک دریځ ورکړي، چې د هغه په وینا په دې توګه غواړي خلک تېر باسي.
افراسیاب خټک زیاته کړه، پاکستان دغه لوبه ځکه پیل کړې چې په دې توګه غواړي په افغانستان او خیبر پښتونخوا کې د طالبانو په لاس پښتانه او بلوڅ ملتپال ووژني او له هغوی څخه غچ واخلي.
افراسیاب خټک وویل، د پاکستان د طالبانو تحریک هم د پاکستاني جنرالانو لهخوا رامنځته شوی، روزل شوی او په وسلو سمبال شوی تحریک دی.
هغه وایي:« هغه مهال به پاکستان ویل، چې دغه تحریک د هند په ملاتړ او د افغانستان د تېر حکومت په همکارۍ رامنځته شوی، چې د افغان جمهوري نظام له پرځېدو وروسته هم پاکستان افغانستان ته د پړې ګوته نیستي؛ خو واقعیت دا دی چې نه ټيټيپي پخوا او نه هم اوس له افغانستانه تمویلیږي، دا ټولې هغه لوبې دي چې د پاکستاني پوځیانو لهخوا پیل شوې او په دې توګه غواړي هم په افغانستان او هم دې غاړې د پښتنو او بلوڅو بر سر خپل راج وچلوي.»
هغه په خپلو خبرو کې په سیمه کې روانه جګړه د پیل شوې سترې نړۍوالې لوبې يوه برخه یاده کړه او زیاته یې کړه، د پاکستان له بېلابېلو صوبو څخه د افغان کډوال اېستنه هم د دغې لوبې یوه برخه ده.
هغه وايي، په دې توګه نړۍوالو لوبغاړو غوښتل چې افغان کډوال په افغانستان کې د کاري فرصتونو د نشتوالي له امله اړ شي چې د ترهګرو ډلو سره یو ځای شي او په دې توګه دغه نوی ځواک د منځنۍ اسیا هېوادونو ته د سرخوږي په جوړولو سره د نړۍوالو لوبغاړو موخې ترسره کړي.
د افغانستان د ډېپلوماتیکو مرکزونو او قونسلګریو د همغږۍ شورا په اېکس خواله رسنۍ کې د دوشنبې په ورځ (مرغومې ۱۸ مه) خپور کړي یو پیغام کې د طالبانو له خوا د کابل په واټونو کې د ښځو او نجونو وروستۍ خپلسرې او غیر قانوني نیونې په کلکه غندي.
دغه شورا په دې باور ده، چې د هېواد د ښځو او نجونو پر وړاندې د طالبانو دغه ناوړه کړنې د دوی له کرامت او هویت څخه ښکاره سرغړونه ده او همدارنګه د افغانستان د دود او کلتور او د بشري حقونو له پیژندل شویو معیارونو څخه ښکاره سرغړونه ده.
په اعلامیه کې راغلي: "موږ د دغو ټولو ښځو او نجونو د سمدستي او بې له شرطه خلاصون غواړو. دا ډول نیونې د افغانستان په معاصر تاریخ کې بې ساری دی."
د دغه شورا په اعلامیه کې راغلي چې دغه خپلسري نیونې په هیواد کې ټولنیزه باور لاپسې کمزوری کوي. اعلامیه کاږي چې طالبان باید د بشري حقونو د نړیوالو تړونونو له مخې چې افغانستان یې غړیتوب لري، نیول شوې ښځې او نجونې ژر تر ژره خوشې کړي.
د افغانستان د دیپلوماتیکو او قونسلګریو د همغږۍ شورا له ټولو هغو ښځو او نجونو سره خپل پیوستون څرګند کړی چې په ټول هیواد کې له خپلو حقونو دفاع کوي او ځل بیا د دغو میرمنو د حقونو خپل ټینګ ملاتړ څرګندولو سره له نړیوالې ټولنې غواړي چې د دغو سرغړونو په غندلو کې چټک او هر اړخیز اقدامات وکړي.
د پخواني جمهوري دولت د سولې د مرکچي پلاوي مشر معصوم ستانکزي د ملا فضل الرحمان د هغو خبرو په غبرګون کې چې ویلي وو؛ په غزه کې نسل وژنه روانه ده او افغانستان کې ځینې خلک د نجونو د تعلیم په غم کې دي، هغه کرايي ملا بللی او ویلي یې دي چې نوموړی د اسلامي امت لا محتاجي غواړي.
د افغانستان د مذاکراتي ټیم پخوانی مشر معصوم ستانکزي د نجونو د تعلیم په اړه د ملا فضل الرحمان د وروستیو څرګندونو په غبرګون کې د دوشنبې په ورځ پر خواله رسنۍ اېکس لیکلي:"د مولانا شیراني صاحب په خبره: پاکستان هغه چوک دی چې کرایي ملایان، مفتیان او قاتلان ... پکې پریمانه پېدا کیږي".
ملا فضل الرحمان د دوشنبې په ورځ (د مرغومې ۱۸ مه) ویلي، چې په داسې حال کې چې پر غزه بمبارۍ کیږي او هلته ۲۲ زره کسان وژل کیږي، چې ډېری یې ماشومان او ښځې دي او په داسې وضعیت کې هم خلک وايي، چې ولې په افغانستان کې نجونې ښوونځیو ته نه پرېښودل کیږي.
ښاغلي ستانکزي ملا فضل الرحمان ته د کرايي ملا خطاب کړی او ویلي یې دي: “دا کرایي ملا وایي چې په فلسطین که څه حال دی او خلک دلته د نجونو د تعلیم تشویش کوي، په دې معنا چې اسلامي امت دې نور هم ضعیفه او محتاجه پاتې شي.”
د طالبانو لوړ یو شمېر لوړه رتبه مشرانو افغانستان انټرنشنل ـ پښتو ته ويلي، چې د دوی مشر هبت الله اخوندزاده د پاکستان څخه د ملا فضل الرحمان په مشرۍ له راغلي پلاوي سره ليدنه رد کړې. ملا فضل الرحمان افغانستان ته تر تګ مخکې ويلي وو، چې غواړي د طالبانو له مشر سره هم وويني.
پاکستانی سياستوال ملا فضل الرحمان په کابل کې د طالب مشرانو سره تر لېدونو وروسته نن دوشنبه پلان درلود، چې په کندهار کې د دې ډلې له مشر هبت الله اخوندزاده سره وويني.
په کندهار کې د طالبانو يو لوړ رتبه مشر افغانستان انټرنشنل ـ پښتو ته وويل، چې له ملا فضل الرحمان سره د دوی مشر د ليدنې کوم پلان نه لري.
نوموړي زیاته کړه: « شېخ هبت الله اخوندزاده تر دم ګړۍ د ملا فضل الرحمان سره د ملاقات کوم سکېجول نه لري.»
د افغانستان د طالبانو د بهرنيو چارو وزارت څخه هم يوې سرچينې افغانستان انټرنشنل ـ پښتو ته تایيد کړه، چې د طالبانو د مشر له دفتره يې د ملا فضل الرحمان سره د لېدنې وړاندیز رد شوی جواب تر لاسه کړ. « د بهرنيو چارو وزير اميرخان متقي د ملا هبت الله اخوندزاده دفتر ته د ملا فضل الرحمان لپاره د لېدنې وړانديز کړی و؛ خو تېره ورځ يې منفي ځواب تر لاسه کړ، چې نوموړی دې له ريیس الوزرا سره وګوري.»
د طالبانو مشر نن دوشنبه ناوخته په کندهار کې د والي ملا شيرين، خپلو مشاورينو او ځينو دیني علماو سره هم کتلي؛ خو تر اوسه د دې ليدنې اجنډا معلومه نه ده.
ډېر باور دا دی، چې د نوموړي دغه بېړنۍ ناسته هم د ملا فضل الرحمان د کتني اړوند د تصميم نیونې وه.
د پاکستان د جمعیت علمای اسلام ګوند مشر ملا فضل الرحمان د یکشنبې په ورځ (د مرغومې ۱۷ مه) نېټه د یوه پلاوي په مشري کابل ته تللی او هلته یې د طالب مشرانو تر څنګ د دې ډلې له رييس الوزرا سره هم کتلي دي.
تېره ورځ د طالبانو د بهرنيو چارو وزير د هغه سفر ته هيله مندي ښودلې وه او ويلي يې وو، چې د ملا فضل الرحمان سفر به د دواړو هېوادونو ترمنځ د رامنځته شويو ستونزو په هواري کې ګټور تمام شي.