پرون نا وخته وسلهوالو کسانو د خیبر پښتونخوا په لکي مروت کې هغه لس کسه کارکوونکي تښتولي، چې د یو سړک د رغولو چارو ته روان وو. ځايي پولیسو د پېښې د پخلي تر څنګ ویلي، چې د برمته شویو کاریګرو د لټون چارې روانې دي.
دغه پېښه د لکي مروت په حسن خېلو سیمه کې شوې، هلته چې د سړکونو او لویو لارو د جوړولو چارې روانې دي.
دغه کارګرانو د یو شخصي شرکت سره کار کاوه؛ خو داسې ویل کېږي چې دغه شرکت د پاکستان له حکومت سره د سړک جوړولو په چاره کې سترې پروژې پر مخ بیايي.
که څه هم چې د دغې پېښې مسوولیت کومې ډلې په غاړه نه دی اخیستی؛ خو دغه سیمه د خیبر پښتونخوا د نورو سیمو په څېر ډېره نا امنه ده او د ټيټيپي په شان نورې لویې او کوچنۍ وسلهوالې ډلې په کې فعالې دي.
په همدې حال کې پرون په شمالي وزیرستان کې د پاکستان یو پوځي ووژل شو.
د پوځ مطبوعاتي څانګه وايي، چې یو سرتېری یې هغه مهال په نښته کې ووژل شو چې دوی غوښتل د خپلو مخالفو وسلهوالو یو پټنځای ویجاړ کړي.
تر دې مخکې پرون د باجوړ په مامندو کې د پولیسو د سپرلۍ د موټر په لاره کې د بمي چاودنې له امله لږ تر لږه ۶ پولیس ووژل شول او ۲۲ نور ژوبلیدلي وو.
د پروني برید مسوولیت ټيټيپي په غاړه اخیستی دی.
