طالبان: م.م ډاډ راکړی، چې د افغان بزګرانو سره د نشهیي توکو د نه کرلو په بدل کې مرسته کوي
د طالبانو د کرنې او مالدارۍ وزارت وايي، ملګرو ملتونو ورسره ژمنه کړې چې د هغو بزګرانو لاسنیوی به کوي چې نن سبا په خپله ځمکه د کوکنارو پر ځای نور فصلونه کري.
د طالبانو د کرنې او مالدارۍ وزارت وايي، ملګرو ملتونو ورسره ژمنه کړې چې د هغو بزګرانو لاسنیوی به کوي چې نن سبا په خپله ځمکه د کوکنارو پر ځای نور فصلونه کري.
له دغه وزارته په خپره شوې وینا پاڼه کې چې د مرغومي په ۱۸مه خپره شوې راغلي، چې د طالبانو د کرنې وزیر عطاءالله عمري په کابل کې د یوناما له مشرې روزا اوتونبایوا او د خوړو او کرنې نړۍوالې ادارې له رییس ریچارډ ټرانچارډ سره په کتنه کې د دغو مرستو یادونه شوې او اغلې اوتونبایوا د افغانستان له کروندګرو او بزګرانو سره د همکارۍ لپاره د بېلابېلو هېوادونو او سازمانونو د چمتووالي خبره کړې او ویلي یې دي، چې ملګري ملتونه د نشهیي توکو د کښت او کاروبار د مخنیوي په چاره کې د افغان بزګرانو دغه کړنه ستایي او په دې برخه کې د هغوی لاسنیوي ته چمتوالی لري.
د طالبانو د مشر ملا هبت الله د یو فرمان په صادرولو سره په افغانستان کې د کوکنارو په کر بندیز لګولی؛ خو لا هم د دغه هېواد په ګڼو ولایتونو کې د نشهیي توکو د تولید فابریکې فعاله دي او په ګڼو بازارونو کې د دغو توکو پېر او پلور په ازاده توګه ترسره کېږي.
د ملګرو ملتونو د راپور له مخې، افغانستان د پرمختللیو نشهیي توکو لکه د ښیښې په تولید کې لومړی ځای لري.
تر دې وړاندې د افغانستان ګاونډي هېواد تاجکستان هم له دغه هېواده د نشهيي توکو په قاچاقو اندېښنه ښودلې وه او دا یې هم ویلي وو، چې د طالبانو له واکمنېدو وروسته یې له افغانستان سره په پوله شاوخوا لس ټنه نشهیي توکي نیولي دي.
