شمالي وزیرستان کې د پښتونخوا د صوبايي پارلمان لپاره نوماند کلیم الله او ور سره دوه ملګري یې د وسلوالو په برید کې ووژل شول. د شمالي وزیرستان مرکز میرانشاه کې پولیس د پېښې په تایید سره وایي، چې څه مهال مخکې کلیم الله داوړ د وسلوالو له برید څخه روغ وتلی و.
د ځايي چارواکو په خبره؛ کلیم الله داوړ د صوبايي پارلمان لپاره خپلواک نوماند و.
د نوموړي مړی روغتون ته لېږدول شوی دی.
څه مهال مخکې د شمالي وزیرستان په میرانشاه کې د قامي اسمبلۍ پر پخواني غړي او د پي ډي اېم پر بنسټګر محسن داوړ هم برید شوی و.
د ایران د بهرنیو چارو وزارت د «افغان کشالې» د هوارولو اړتیا تر سرلیک لاندې په يوه خبرپاڼه کې ټینګار کړی، چې اوسنی افغانستان د یوې نوې ناکامۍ زغم نه لري. دغه وزارت ليکلي، چې پخوانيو کشالو ته د حل لارې تر پيدا کولو پرته د نويو دوسيو پرانيستل د افغانستان اوسنۍ ستونزه نه شي حلولای.
د ایران د بهرنیو چارو وزارت نن د دې خبرپاڼې په خپرولو سره په نړیوال سازمان کې د افغانستان د ژرګډون غوښتنه وکړه.
د دغه وزارت په خبرپاڼه کې د افغانستان لپاره د ایران د سیمه ییزو اړيکو يوې ډلې پر جوړولو ټینګار شوی دی.
په ورته وخت کې په کابل کې د ایران سفير د طالبانو د بهرنيو چارو له وزير سره په ليدنه کې د افغانستان لپاره د ملګرو ملتونو د نوي استازي ټاکل «نامناسب» بللي دي.
د ایران د بهرنیو چارو وزارت هم ټېنګار کړی، چې له ګاونډیانو سره د همږغۍ لپاره د افغانستان غوره شوې لاره به هغه ترتیب برابر کړي چې د نړیوال نظام په جوړښت او تنظیم کې د نویو ماموریتونو د تامینولو لار به هواره کړی.
د ایران د بهرنيو چارو وزارت د افغانستان په اړه د ملګرو ملتونو د نوې پرېکړه لیک په اړه وړانديز کړی، چې له نوي او جنست ځپلي چلن مخکې باید د دغه هېواد د اوسنيو ستونزو د حل لپاره باید هڅې او مثبتې پايلې ترلاسه شي.
په خبرپاڼه کې راغلي؛ « ایران په دې باور دی، چې په افغانستان او سیمه کې ثبات او امنیت ته اړتیا ده، چې ملګري ملتونه د خپلو دندو او مسوولیتونو په ترسره کولو سره بايد مسایلو، ستونزو او بشري وضعیت ته ځانګړې پاملرنه وکړي.»
د ایران د بهرنيو چارو وزارت ليکلي، چې په راتلونکې ازموينه کې ناکامي به په نړيواله سوله او امنيت منفي او ناوړه اغېز وکړي.
که څه هم ایران تر اوسه طالبان په رسمیت نه دي پېژندلي، خو له دوو کلنو راهيسې يې له طالبانو سره خپلې سياسي، ډيپلوماټيکې او اقتصادي اړيکې ټينکې کړې دي.
تر دې مخکې یو شمېر ایراني چارواکو ویلي وو، چې دوی دغه ډله په رسمیت نه پېژني، خو له طالبانو سره به خپلو اړیکو ته دوام ورکړي.
په دې وروستيو کې د امريکا د دفاع وزارت يوه پخواني لوړ رتبه چارواکي ويلي وو، چې ایران له ۲۰۱۲ کال راهيسي هر کال طالبانو ته سل مېلېونه ډالره ورکوي.
په افغانستان کې د امریکايي ځواکونو د قومندان پخواني سلاکار کارټر مالکاسیان ویلي، چې ایران په افغانستان کې «دوه ګونی لوبه» کوي.
د ایران د حکومت مخالفې وسلوالې ډلې د دغه هېواد د سیستان بلوچستان په راسک کې د پولیسو پر مرکز د برید مسوولیت ومانه د ایراني رسنیو د راپور له مخې په دې برید کې چې نږدې درې ساعت یې دوام درلود یو پولیس وژل شوی، خو جیش العدل وايي پولیسو ته یې ډېر مالي او ځاني تاوان اړولی دی.
د راسک یوه امنیتی چارواکي سلیم کدخدا هم رسنیو ته ویلي وسلوالو تاڼې یا پوستې ته د ننوتلو هڅه کوله، خو د مرستندوی ځواکونو رسېدو سره په شا وتمبول شول.
د بلوڅانو اړوند خبرونو وېبپاڼه حال وش وايي، د وسلوالو برید پسې جګړه پیل شوه چې تر څلورو ساعتونو یې دوام درلود. د دې رسنۍ د راپور له مخې په دې برید کې پر ډزو سربېره څو درنې چاودنې هم شوې دي.
دې وروستیو کې پر ایراني ځواکونو د جیش العدل بریدونه ډېر شوي دي.
دې ډلې د تېر ډیسمبر پر ۱۵ هم د راسک پر امنیه قومندانۍ برید وکړ چې له امله یې ۱۲ کسان ووژل او څو نور ټپیان شول.
تر هغه مخکې یې په زاهدان کې هم د پولیسو پر مرکز برید کړی و.
د امریکا مرکزي قوماندانۍ ویلي، چې د دغه هېواد او برېټانیا ځواکونو د ایران په ملاتړ د حوثیانو ۱۸ بې پیلوټه الوتکې، دوه د بیړۍ ضد کروز توغندي او یو د بېړۍ ضد بالستیک توغندی ویشتلي دي. سنټکام زیاته کړه چې دا بې پیلوټه الوتکې او توغندي د سره سمندرګي د کښتیو لارو په لور توغول شوي و.
د سینټکام په وینا، په دغو بریدونو کې چاته د سر زیان نه دی اوښتی او نه هم کوم مالي زیان اوښتی دی.
سنټکام وویل، «درې امریکایي کیښتیو او جنګي الوتکو، د برېټانیا له توغندي ویشتونکي کیښتۍ ایچایمایس ډایمنډ سره په ګډه دا ډرون او توغندي ویشتلي دي. د لړم له ۲۸ نیټې راهیسې دا د حوثیانو ۲۶م برید دی چې په سوداګریزو بار وړونکو بیړیو ترسره کیږي.»
په وروستیو اونیو کې یمني حوثيانو په سور سمندرګي کې د سوداګریزو کښتیو کارګو په نښه کړې دي.
دغه ډله وايي چې له اسراييل سره په جګړه کې له فلسطينه د ملاتړ په پار دغه بريدونه ترسره کوي.
د حوثیانو له لوري په بیړیو باندې بریدونه، زیات شمېر هیوادونو د نړیوالې سوداګرۍ لپاره د اندیښنې وړ بللي دي.
سرچینې وايي د لکي مروت په تختې خيلو سېمه کې تېره شپه د يوې کورنۍ اته غړي وسله والو په ډزو وژلي دي. افغانستان انټرنشنل پښتو څانګې ته د چهارشنبې په ورځ (د مرغومي ۲۰مه) له سیمې څخه باوري سرچینې ويلي چې د نور محمد مروت په نامه د یوه تن د کورنۍ اته تنه وسله والو وژلي دي.
په وژل شویو کسانو کې څلور سړي، دوه ښځې او دوه ماشومان شامل دي.
سرچینې زیاتوي چې دغې کورنۍ ته په سیمه کې د ټي ټي پي د یوه ځايي قوماندان ټيپوګل مروت له لوري پخوا ګواښونه هم شوي وو. خو تر اوسه پورې نه ده په ډاګه شوې چې ولې دغې کورنۍ ته ګواښونه شوي وو.
ځايي پولیسو د خبر تر خپرېدو یو ساعت وروسته په خپره شوې خبرپاڼه کې په دغې پېښه کې د ۱۱ کسانو د وژل کیدو خبره کړې.
خو تر اوسه پورې د ټي ټي پي وسله والې ډلې په دې اړه څه نه دي ویلي.
ټيپوګل مروت د ټي ټي پي هغه قوماندان و چې د راپورونو له مخې دوه میاشتې وړاندې په کونړ کې ووژل شو.
سرچینې زیاتوي چې د سیمې خلک قهرېدلي او په وسله والو پسې یې د غچ اخیستلو په پار وسلو ته لاس کړی.
ویل کیږي تر دغې پیښې وروسته په یاده سیمه کې د ځايي پولیسو له لوري چاڼیز عملیات روان دي.
په دې ورستيو کې دا دريم ځل دی چې د خیبر پښتونخوا په لکي مروت کې د ولسي وګړو د وژلو پېښه رامنځته کیږي.
په تېرو پنځو میاشتو کې د خیبر پښتونخوا په قبايلې سېمو وزيرستان،کرمه ایجنسۍ، بنو، میرعلي، لکي مروت، دېره اسمعیل خان، ټانک او نورو سیمو کې د وسله والو بریدونو له امله ولسي خلکو ته درنه مرګژوبله اوښتې.
سرچینې وايي، تېره ورځ د شمالي وزیرستان په میرعلي سیمه کې مخ پټو وسله والو په سیمه کې ځايي سوداګرو او د نورو سیمو کارګرانو ته ګواښ کړی چې سیمه دې پریږدي.
د ملګرو ملتونو د بشري چارو د همغږۍ دفتر (اوچا) د سه شنبې په ورځ راپور ورکړ چې د اوکراین شاوخوا ۴۰ سلنه وګړي (۱۴.۶ میلیون کسان) سږکال بشري مرستو ته اړتیا لري. د اوچا په وینا، د روسیې د یرغل له امله نور ۶.۳ میلیونه خلک د هیواد پرېښودو ته اړ شوي دي.
د اوچا ویاند ینس لارک وویل چې د لویې کچې بشري عملیاتو دوام د تل په څېر په دغه هیواد کې بیړنۍ اړتیا ده.
پر اوکراین د روسیې د یرغل شاوخوا دوه کلنې جګړې د اوکراین اقتصادي بنسټ کمزوری کړی او د اوکراین اقتصاد تر ډېره د لوېدیځو هېوادونو په مالي ملاتړ تکیه کړې، اوس کییف اندېښمن دی چې دا ملاتړ به دوام ونه کړي.
تر دې مخکې د اوکراین د مالیې وزیر هم اعتراف کړی و چې اروپايي ټولنه سږ کال د دغه هېواد د ۴۵ سلنه مالي اړتیاوو په برابرولو سره د دغه هېواد تر ټولو ستره تمویلونکې او په مستقیم ډول ملاتړې ده.