د افغانستان د ازادۍ جبهه: په بغلان کې مو د طالبانو پر امر بالمعروف ادارې برید کړی
د افغانستان د ازادۍ جبهه وايي؛ د بغلان ولایت په پلخمري ښار کې یې د طالبانو پر امر بالمعروف ادارې برید کې د دغې ادارې یو مبلغ وژلی او دوه نور یې ټپیان کړي دي.
د افغانستان د ازادۍ جبهه وايي؛ د بغلان ولایت په پلخمري ښار کې یې د طالبانو پر امر بالمعروف ادارې برید کې د دغې ادارې یو مبلغ وژلی او دوه نور یې ټپیان کړي دي.
د ازادۍ جبهې په خواله رسنۍ اکس کې په خپور کړي پیغام کې ویلي دغه “اوپراتیفي” برید یې د یکشنبې په ورځ – د مرغومې ۲۴ مه – ماښام مهال ترسره کړی دی.
دغه جبهه وايي، د ښځو او نجونو سره د طالبانو د امربالمعروف ادارې د تبعیضي چلند له امله یې پر دغې ادارې برید کړی دی.
طالبانو تر اوسه د دغه برید په اړه څه ندي ویلي.
د اسراییل د بهرنیو چارو وزارت استازې او د بیت المقدس مرستیاله ښارواله فلوم حسن نخوم وايي؛ چې د افغانستان طالبان او د غزې حماس ډلې د ایران نیابتي ډلې دي او همدغه هېواد یې مالي ملاتړ کوي.
نوموړې له افغانستان انټرنشنل - پښتو سره په ځانګړې مرکې کې ویلي، دي چې ایران په سیمه کې د یو لوی "شیطان" حیثیت لري، لکه د نن ورځې "هټلر".
د نخوم په خبره، چې ایران نه یوازې دا چې د طالبانو مالي ملاتړ کوي؛ بلکې حماس، حزب الله، حوثي وسلوال او یو شمېر نورو ډلو ته مالي ملاتړ برابروي.
د افغانستان د پخواني جمهوري دولت پر مهال هم د هغه دولت بېلابېلو چارواکو ایران د طالبانو په ملاتړ تورن کړی و او ویلي یې وو، چې ایران طالبانو ته وسلې او پېسې ورکوي.
نوموړې به غزه کې د ملکي وګړو د مرګ ژوبلې په اړه وايي، چې د غزې د روغتیا د چارواکو په شمېرو او خبرونو کې غولېدونکي ارقام وړاندې شوي او د باور وړ نه دي.
د اسراییل د بهرنیو چارو وزارت استازې د غزې د بیا نیولو په اړه وویل، چې دوی یو ځل په ۲۰۰۵ کال کې له غزې وتلي او بیا د غزې د نیولو هوډ نه لري.
هند د افغانستان د ملې لوبډلې څخه د شل اوره لوبلړۍ دویمه لوبه د ۶ ويکټو په توپير وګټله او افغان ۱۹ کلنو کم عمره لوبډلې بيا په تمريناتي لوبه کې انګلستان ته د ۶۷ منډو په توپير ماته ورکړه.
د هند او افغانستان په لوبه کې پچه کوربه هېواد وګټله او افغان لوبډلې ته يې د توپوهنې بلنه ورکړه.
افغان کرېکټ لوبډلې په ۲۰ اورونو کې د ټولو لوبغاړو په سوځېدو هند ته ۱۷۲ منډې هدف وټاکه.
افغان لوبغاړي ګلبدين نایب په ۳۵ توپونو تر ټولو ډېري ۵۷ منډې جوړې کړې.
هند کرېکټ لوبډلې د ۴ لوبغاړو په سوځېدو په ۱۵.۴ اور کې دغه هدف پوره کړ.
هندي لوبغاړو يشاسوي جيسوال په ۳۴ توپونو ۶۸ او شيوام دوبی په ۳۲ توپونو ۶۳ ناسوځېدلې منډي وکړې.
افغان کرېکټ ملي لوبډلې دغه لوبه د ۶ ويکټو په توپير وبايلله.
بل لور ته بيا د ۱۹ کلنو کم عمره نړۍوالو ۵۰ اوريزو لوبو ته د تياري په موخه افغان ۱۹ کلنو ځوانانو له انګلستان څخه د ۶۷ منډو په توپير لوبه وګټله.
د افغانستان او انګلنډ تر منځ د دې تمريناتي سيالۍ پچه انګلنډ وګټله او افغانستان ته یې د توپوهني بلنه ورکړه.
د افغان ۱۹ کلنو کم عمره لوبډلې د خپلو ټولو لوبغاړو په سوځېدو انګلنډ کرېکټ لوبډلې ته ۲۳۸ منډې هدف وټاکه.
په افغان لوبډله کې نعمان شاه ۶۵، سهيل خان ۵۲ او خالد تڼيوال ۳۰ تر ټولو ډېرې منډې جوړي کړې.
انګلستان لوبډلې د ټولو لوبغاړو په سوځېدو ۱۷۱ منډې جوړې کړې.
افغان توپ اچوونکي محمد غضنفر تر نورو لوبغاړو بهترينه توپ اچونه وکړه او د سيالې لوبډلې پنځه لوبغاړي يې وسوځول.
بايد وويل شي، چې د افغانستان او هند تر منځ د درېيو شل اوريزو لوبو لړۍ درېيمه لوبه به د رواني جنوري میاشتي په ۱۷ مه نېټه وي.
د کابل د یو شمېر خصوصي روغتونونو مسوولینو افغانستان انټرنشنل - پښتو ته ویلي، چې د طالبانو د امر بالمعروف وزارت محتسبینو ترې د ښځینه کارکوونکو نوملړ او د هغوی په اړه معلومات غوښتي دي. یادې سرچینې وايي؛ له تېرې اونۍ راهیسې د کابل بېلابېلو روغتونونو ته د امر بالمعروف غړي ورغلي دي.
د کابل په خېرخانه کې د یوه خصوصي روغتون مشر افغانستان انټرنشنل - پښتو ته وویل، چې د تېرې اونۍ د سې شنبې په ورځ د امر بالمعروف یو شمېر محتسبین د دوی روغتون ته ورغلي او له هغوی څخه یې د ښځینه ډاکترانو، نرسانو او نورو کارکوونکو په اړه معلومات غوښتي دي.
نوموړی وايي: "که څه هم موږ ورسره وغږېدو چې دا د اصولو خلاف کار دی او موږ نه شو کولی، چې تاسو ته د خپلو همکارانو په اړه معلومات درکړو؛ خو خبرو نتیجه نه ده ورکړې او موږ ته یې ویلي، چې په لسو ورځو کې باید ټول معلومات چمتو کړي".
د خصوصي روغتون یاد مشر وویل، چې امر بالمعروف ترې د هرې ښځینه کارکوونکې نوم، پلار نوم، دنده، د کور ادرس، ټیلفون شمېره، د ټولنیزو رسنیو د اکاونټونو نومونه او یو کوچنی تصویر غوښتي دي.
همدا راز د کابل د دشت برچي سیمې د یوه خصوصي روغتون سرطبیب افغانستان انټرنشنل - پښتو ته وویل، چې د امر بالمعروف غړو ترې معلومات غوښتي او دوی یاده موضوع د طالبانو د عامې روغتیا له وزارت سره شریکه کړې ده.
ډاکتر وویل: "د عامې روغتیا وزارت چارواکو هم مثبت ځواب نه دی راکړی او راته ویل شوي، چې امر بالمعروف پر ټولو ادارو د څار حق لري او باید معلومات ورکړي".
د کابل د ارزان قیمت د سیمې د یوه شخصي روغتون مشر د نوم د نه ښودلو په شرط ویلي، چې د امر بالمعروف محتسبینو ورته ویلي، چې د پخوانیو او اوسنیو ښځینه ډاکترانو، نرسانو او اداري کارکوونکو په اړه ورته معلومات ورکړي او که کله نوې مېرمنې په دندو ګوماري باید دوی ته یې معلومات ورکړي.
بل خوا د خصوصي روغتونونو د اتحادیې یوه غړي افغانستان انټرنشنل - پښتو ته تایید کړه، چې د امر بالمعروف غړو له یو شمېر روغتونونو څخه معلومات غوښتي دي؛ خو دا موضوع په رسمي ډول له اتحادیې سره نه ده شریکه شوې.
د طالبانو د عامې روغتیا وزارت د مالي او اداري معینیت یوې سرچینې افغانستان انټرنشنل - پښتو ته وویل، چې یاده موضوع د طالبانو د روغتیا له وزیر سره شریکه شوې ده.
سرچینې زیاته کړه: "وزیر وویل، چې امر بالمعروف ته د طالبانو مشر ملا هبت الله اجازه ورکړې او دغه وزارت د طالبانو د مشر د امر له مخې حق لري، چې له وزارتونو معلومات وغواړي".
د طالبانو د امر بالمعروف غړو دغې غوښتنې د کابل د خصوصي روغتونونو او کلینکونو ډاکترانې او نرسانې وېرولي دي.
په کابل کې د ښځینه ناروغیو متخصصه چې خپل مستعار نوم سکینه ښيي وايي، چې د طالبانو له خوا د شخصي معلوماتو له غوښتلو وروسته یې په خپل کار کې ډار پېدا کړی دی.
هغې زیاته کړه: "امر بالمعروف زموږ په شخصي معلوماتو څه کوي؟ خو معلومه ده، چې دوی ځانته معلوموي چې موږ پخوا چېرې کار کړی او څه مو کړي یا څه کوو؟".
د نوموړې په خبره، که چېرې طالبان پرې ورځ تر بلې د وېرې او ډار حلقه راتنګوي؛ نو ګڼې ښځینه ډاکترانې او نرسانې به خپلې دندې پرېږدي.
هڅه مو وکړه، چې په دې اړه د طالبانو د عامې روغتیا وزارت نظر هم را واخلو؛ خو له پرله پسې اړیکو نیولو هم ونه توانېدو.
دا لومړی ځل نه دی، چې د طالبانو د امر بالمعروف غړي له یو شمېر خصوصي یا دولتي ادارو څخه معلومات غواړي، له دې وړاندې یې د ننګرهار پوهنتون د بېلابېلو پوهنځیو له څانګو څخه د استادانو په اړه معلومات غوښتي وو.
د ایران د خراسان رضوي د سرحدي ځواکونو قومندان خبر ورکړی، چې ۱۳ زر ۸۵۲ هغه افغان کډوال چې د استوګنې رسمي اسناد يې نه درلوده بیرته افغانستانه ته ستانه شوي دي. مجید شجاع خبریالانو ته وویل، چې دغه کډوال په تیرو لسو ورځو کې پیژندل شوي او ایستل شوي دي.
ايرنا خبري اژانس د يکشنبې په ورځ د ښاغلي شجاع له قوله خبر ورکړی، چې دغه کسان د پولې په صفري نقطه کې د دوغارون- اسلام کلا له لارې افغانستان ته وسپارل شول.
دغه ایراني چارواکي یو ځل بیا په ټینګار سره ویلي هغه افغانان، چې په ناقانونه توګه د دوی هېواد ته داخلېږي، بېرته به وشړل شي.
مجيد شجاع دا هم وويل، چې په تېره يوه اونۍ کې يې د تایباد په پوله کې د موټرو د پلټنې پر مهال ٢٩ قاچاق موبايلونه نيولي دي.
د دغو سمارټ تلیفونو ارزښت درې میلیارده او ۴۷۵ ریال ښودل شوی دی.
ایران خبر ورکړی، چې په تېرو ۹ میاشتو کې څه باندې پنځه لکه شل زره افغان کډوال له ایران څخه د خراسان د تايباد د دوغارون د پولې له لارې ايستل شوي دي.
د کډوالو په چارو کې د ملګرو ملتونو د عالي کمېشنرۍ د راپور له مخې په ایران کې د مېشتو وګړو شپږ سلنه افغانان جوړوي.
په دې وروستیو کې یوه ایراني چارواکي اعلان وکړ، چې د دغه هېواد په ۱۶ ولایتونو کې یې د افغان کډوالو پر حضور بندیز لګولی دی.
د طالبانو د کورنیو چارو وزارت ویاند وايي، نن په نیمروز ولایت کې یوه ځانمرګي د دې ډلې پر والي د برید پلان درلود، خو هدف ته تر رسېدو مخکې ووژل شو. عبدالمتین قانع زیاتوي چې د بریدګر په نښه کولو سره باروتو چاودنه وکړه او د نوموړي پر وژل کېدو سربېره دوه طالب سرتېري هم ټپیان شول.
افغانستان انټرنشنل ته رسېدلي غږیز پیغام کې یو طالب سرتېری وايي، چې دا بریدګر له دوو تلاشیو تېر شوی دی.
دغه طالب زیاتوي چې د ځانمرګي د ویشتلو پر مهال والي د لمونځ لپاره له دفتر ووت.
له دې پېښې وروسته خواله رسنیو کې د نیمروز لپاره د طالبانو د والي محمد قاسم خالد ویډیو هم خپره شوې چې له نورو چارواکو سره پر ټلیفون غږېږي او وايي جوړ تیار دی.
که څه هم د طالبانو د کورنیو چارو وزارت ویاند په دې برید کې د نورو ښکېلو کسانو په هکله څه نه دي ویلی، خو والي په خپلو خبرو کې دا هم وايي، چې «دا بل کس پسې یې ملګري-طالبان- ګرځي.»
تر دې مخکې د بلخ لپاره د طالبانو والي په خپل کاري دفتر کې ووژل شو او تر هغه پخوا د بدخشان لپاره د دې ډلې امنیه قومندان هم دفتر ته د تللو پر مهال د موټربم چاودنه کې ووژل شو.
تر اوسه د دې برید په هکله کومې ډلې څه نه دي ویلی، خو د تېرو بریدونو مسوولیت داعش منلی و.