د لبنان د حزب الله ډلې مشر حسن نصرالله په یمن کې د حوثي وسلوالو پر مرکزونو د امریکا بریدونه "احمقانه" بللي دي او په توند غبرګون سره یې ویلي، چې دا بریدونه به سور سمندرګی د جګړې په ډګر بدل کړي.
نصرالله د یکشنبې په ورځ «د جنوري ۱۴» وویل، چې د امریکا یرغل په سور سمندرګي کې د سمندري تګ راتګ خوندیتوب له خطر سره مخ کوي او دغه سیمه د جګړې په ډګر بدلوي.
هغه ټینګار وکړ، چې د واشنګټن پوځي عملیات به پرته له دې چې پر اسراییلي کښتیو او اسراییل ته تلونکو بېړیو بریدونه او ګواښونه زیات کړي، بله پایله نه لري.
ښاغلي نصرالله دغه څرګندونې د حزب الله د یوه جګپوړي قوماندان وسام (جواد) الطویل د وژل کېدو د اوومې کلیزې په مناسبت په مراسمو کې وکړې.
نوموړی د لبنان په سویل کې د اسراییل په یوه هوايي برید کې وژل شوی و.
وروسته له هغې چې په سره سمندرګي کې امریکا د یوه امنیتي ایتلاف هوډ کړی، د لبنان حوثي وسلوال د دغه ایتلاف مخالفت کوي او د ایتلاف پر مشترکو اهدافو یې بریدونه پیل کړي دي.
همدا راز تېره اونۍ یو شمېر امریکايي رسنيو د یو شمېر چارواکو په حواله په امریکا کې د حزب الله د احتمالي بریدونو په اړه د اندېښنې خبر هم ورکړی و.
