د ایران او پاکستان له لورې پر یو بل د توغندیزو بریدونو په ترڅ کې د بلوڅانو وژل کېدو ته په غبرګون د بشري حقونو فعاله ماهرنګ بلوڅ وايي، دواړو هېوادونو د عامو بلوڅ ماشومانو او ښځو ژوند له ګواښ سره مخامخ کړی دی.
په پاکستان کې د بلوڅانو د نسل وژنې په غبرګون د پرلت سرلارې او د بشري حقونو فعاله ماهرنګ بلوڅ د پنجشنبې په ورځ د (مرغومي ۲۸مه) پر خپلې اېکس پاڼه د ایران له لوري د بلوچستان ایالت په پنجګور سیمه کې او د پاکستان له لورې د ایران د سروان ښار پر یو شمېر کورونو په توغندیزو بریدونو کې د وژل شویو ماشومانو انځورونه شریک کړي او لیکلي یې دي چې، دواړو هېوادونو د عامو بلوڅ ماشومانو او ښځو ژوند په خطر کې اچولی دی.
همدارنګه نوموړې لیکلي:« پاکستان او ایران د خپل امنیت او حاکمیت د خوندیتوب په پلمه د بلوڅانو پر ضد توغندي توغوي او د پولې دواړو غاړو ته د بلوڅانو امنیت یې له جدي ګواښ سره مخامخ کړی دی.»
د بشري حقونو دغه فعاله چې د تېرو ۵۷ ورځو راهیسې د پاکستان په پلازمېنه اسلام اباد کې د بلوڅانو د نسل وژنې په غبرګون یې پرلت وهلی وايي:« دا د اندېښنې وړ حقیقت دی، چې د امنیت په نوم ناوړه ګټه اخیستل کېږي او د بې ګناه بلوڅو ولسي وګړي په تېره بیا ښځې او ماشومان د دغسې سیاستونو قرباني کېږي.»
دا په داسې حال کې ده، چې سه شنبه (د مرغومي ۲۶مه) تسنیم خبري اژانس د پاکستان پر خاوره د ایران د بې پیلوټه الوتکو او توغندیو د برید خبر ورکړی او لیکلي یې دي، چې په دغه برید کې د جیش الظلم (جیش العدل) دوه مرکزونه ویجاړ شوي دي.
له بلې خوا د پنجشنبې په ورځ بیا پاکستان د ایران پر سروان ښار توغندیز برید وکړ، چې له امله یې د ښځو او ماشومانو په ګډون ۹ تنه وژل شوي دي.
