د ایران پوځ: په کرمان کې د یوه سرتېري په ډزو کې پنځه ایراني پوځیان وژل شوي دي
د ایران په جنوب ختیځ کې د پوځي قرارګاه قوماندان امیر غلامانیان ویلي، چې د یکشنبې په ورځ یو تن عسکر پر خپلو ملګرو ډزې وکړې، چې له امله یې ۵ تنه عسکر ووژل شول.
د ایران په جنوب ختیځ کې د پوځي قرارګاه قوماندان امیر غلامانیان ویلي، چې د یکشنبې په ورځ یو تن عسکر پر خپلو ملګرو ډزې وکړې، چې له امله یې ۵ تنه عسکر ووژل شول.
هغه زياته کړه: بريد کوونکى سمدلاسه له پوستې تښتېدلى او د نيولو هڅې يې روانې دي.
دا د خپل ډول لومړنۍ پېښه ده، چې د ایران په پوځي حلقو کې رامنځته کیږي.
د امریکا د مرکزي قوماندې د یوې اعلامیې له مخې؛ په عراق کې امریکایي سرتېري وروسته له هغه چې د ایران ملاتړو ملېشو د عراق په لویدیځ کې د الاسد په هوايي اډه د بالستیک توغندیو او راکټونو برید وکړ؛ د احتمالي دماغي زخمونو په موخه یې طبي ارزونه کیږي.
په اعلامیه کې راغلي، چې د جنورۍ پر ۲۰ د شنبې په ورځ د ماښام په ۶:۳۰ بجو څو بالستیک توغندي پر دغه اډه لګیدلي دي.
اعلامیه کاږي: "ډېری توغندي د اډې د هوایي دفاعي سیسټمونو له خوا شڼډ شوي؛ خو ځینو نورویې بیا دغه اډه زیانمنه کړې ده."
د امریکا د مرکزي قوماندې په اعلامیه کې ویل شوي، چې د زیانونو ارزونه روانه ده او یو شمېر امریکايي سرتېري د دماغي زخمونو له پلوه ارزول کیږي.
په عراق کې اسلامي مقاومت نومې اورپکې ډلې چې د ایران له خوا یې ملاتړ کیږي؛ د دغه برید مسوولیت پر غاړه اخیستی، کوم چې د عراق له خاورې ترسره شوی دی.
دا برید د اکټوبر له میاشتې راهیسې د ترسره شويو ۱۴۰ بریدنو له ډلې تر ټولو لوی بلل کیږي.
دا بریدونه د ځینو څارونکو په اند د اسراییل - حماس جګړې په جریان کې د فلسطینیانو سره د خواخوږۍ په موخه ترسره کیږي.
د طالبانو تر کنټرول لاندې ارګ د یکشنبې په ورځ په کابل کې د اروپايي ټولنې له سفیر سره د طالبانو د سیاسي مرستیال د لیدنې خبر ورکړی.
ارګ د رافیلا ایودیس له خولې لیکلي، چې اروپايي ټولنه له افغانستان سره خپلو مرستو ته دوام ورکوي او د افغانستان او اروپايي ټولنې ترمنځ یې د اړیکو پر پراختیا یې ټینګار کړی دی.
په خبر پاڼه کړې راغلي، چې مېرمن ایوډیس د افغانستان له خلکو سره په ځانګړې توګه په دغه هېواد کې د اقلیم د بدلون د زیانونو د مخنیوي لپاره د نړۍوالو مرستو غوښتنه وکړه.
په دغه لیدنه کې مولوي عبدالکبیر له افغانستان سره د اروپايي ټولنې د چلند د ستاینې په ترڅ کې په افغانستان کې د فساد، مخدره موادو او تاوتریخوالي د کمولو ادعا وکړه.
د طالبانو رییس الوزرا سیاسي مرستیال ویلي، چې داعش په افغانستان کې مات شوی دی.
په افغانستان کې د داعش د "ماتې" په اړه د دغه طالب چارواکي دا ادعا په داسې حال کې کېږي، چې په افغانستان کې د توکمیزو او مذهبي لږکیو پر وړاندې د داعش بریدونه ډېر شوي دي.
د دې ترڅنګ د ملګرو ملتونو امنیت شورا د روان کال د سپتمبر په میاشت کې په یوه غونډه کې په افغانستان کې وسلو او مهماتو ته د داعش خراسان د لاسرسي په اړه اندېښنه څرګنده کړه او ویې ویل، چې د دې ډلې عملیاتي ظرفیت مخ په زیاتیدو دی.
دغه سازمان اټکل کوي، چې په افغانستان کې له ۴۰۰۰ څخه تر ۵۰۰۰ پورې داعش ځواکونه ځای پر ځای دي.
په داسې حال کې چې د یکشنبې په ورځ د حماس تر کنټرول لاندې سیمو کې د اسراییلي ځواکونو بریدونو او جګړو زور اخیستی، د غزې د روغتیایي چارواکي وايي، چې د اکټوبر میاشتې له پیله په غزه کې د اسراییل په بریدونو کې د وژل شویو فلسطینیانو شمېر ۲۵ زره کسانو ته رسېدلی دی.
د رویټرز خبري اژانس په راپور کې راغلي، چې د غزې په شمال کې له جبالیه سمیې څخه نیولې بیا په سویل کې د خان یونس سیمې پورې د اسراییلي ځواکونو او حماس جنګیالیو ترمنځ نښتې روانې دي.
اسراییل ویلي، چې د دوی پوځیانو د غزې شمالي برخه د حماس له شتون پاکه کړې او د دغې سیمې له یو میلیون څخه ډېر اوسېدونکي د بمباریو له امله د غزې سویل ته پناه وړې ده؛ خو د جبالیه د کډوالو په کمپ او د غزې د ښار په شاوخوا نورو سیمو کې لا هم جګړه روانه ده.
د غزې د روغتیا وزارت ویلي، چې په تېرو ۲۴ ساعتونو کې د اسراییل په بریدونو ۱۷۸ فلسطینیان وژل شوي دي. د اسراییل پوځ ویلي، چې یو سرتېری یې په جګړه کې وژل شوی دی.
تېره ۲۴ ساعته روانې جګړه یو تر ټولو خونړۍ ورځ بلل شوې ده.
د دغه وزارت په یوه اعلامیه کې راغلي؛ د اکټوبر له اوومې نېټې راهیسې د اسراییل په بریدونو کې ۲۵ زره ۱۰۵ فلسطینیان چې ډېری یې ښځې او ماشومان دي وژل شوي او ۶۲ زره ۶۸۱ نور ټپیان شوي دي.
دغه وزارت د ملکي وګړو او وسله والو د مرګ ژوبلې تر منځ توپیر نه کوي؛ خو وايي چې ډېری وژل شوي کسان ملکي وګړي دي.
اسراییل د حماس د له منځه وړلو لپاره خپل پوځي کمپاین د اکټوبر په اوومه وروسته له هغه پیل کړ، چې دغې ډلې پر اسراییل برید وکړ او سویلي ښارګوټو او پوځي اډو ته یې ننوتل.
په دغه برید کې ۱۲۰۰ کسان وژل شوي وو، چې ډېری برخه یې ملکي وګړو جوړوله او ۲۵۳ نور د حماس له خوا یرغمل شوي وو.
د تهران او اسلام اباد تر منځ د کړکېچ له زیاتېدو سره د پاکستان د سند صوبې د ترهګرۍ ضد ادارې اعلان کړی، چې د لښکر زینبیون د ډلې یو "روزل شوی ترهګر" یې نیولی دی. دا ډله د ایران تر څارنې او ملاتړ لاندې فعالیت کوي نیولی دی.
د پاکستان د سند صوبې د ترهګرۍ ضد ادارې اعلان وکړ، چې دغه کس د کراچۍ په سرزاب بازار سیمه کې د امنیتي ځواکونو د عملیاتو په ترڅ کې نیول شوی دی.
نوموړي اعتراف کړی، چې د یوه "ګاونډي دښمن هېواد" د استخباراتو لپاره یې مهم معلومات راټولول؛ خو د دې رياست په اعلاميه کې د کوم مشخص استخباراتي سازمان يادونه نه ده شوې.
د پاکستان د سند صوبې د ترهګرۍ ضد ادارې ویلي، چې نیول شوی کس "محمد مهدي" نومیږي او د پاکستان پر یو مفتي تقي عثماني باندې په برید کې یې مستقیم رول درلود.
مفتي عثمان د پاکستان د سترې محکمې پخوانی قاضي او د اسلامي همکاریو د سازمان د اسلامي فقهې د نړۍوالې اکاډمۍ دایمي غړی و.
د خپرو شويو معلوماتو له مخې؛ نوموړي دا هم په ډاګه کړې، چې د رضا جعفري او عابد رضا په نومونو يې دوه ملګري یې په کراچۍ کې د مذهبي فرقو پر مهمو شخصيتونو په بريدونو کې لاس درلود.
د دغه رپوټ له مخې؛ مهدي تر لاسه شوې وسلې او چاودېدونکي توکي په خپل کور کې ساتلي وو او د وسلو په پېر او پلور کې يې لاس درلود.
دا خبر په داسې حال کې خپور شو، چې د پاکستان او ایران اړیکې په دې وروستیو ورځو کې د اسلامي انقلابي ګارډ قول اردو او د پاکستان د پوځ له خوا د یو بل پر خاوره د متقابلو پوځي بریدونو له امله بې سابقې ترینګلې شوې دي.
د پاکستان یوه امنیتي چارواکي پاکستاني رسنیو ته ویلي، چې نیول شوي کس پخوا په ایران کې پوځي زده کړې کړې دي.
پر زینبیون ډلې تور دی، چې په پاکستان کې سني مذهبه دیني علماء په نښه کوي او دا ډله د ایران د سپاه پاسدارن په مستقیم ملاتړ په بلوچستان کې فعالیت کوي.
امنیتي سرچینو رویټرز خبري اژانس ته ویلي، چې د حزب الله دوه جنګیالي د یکشنبې په ورځ هغه مهال وژل شوي چې یوې اسراییلي بې پیلوټه الوتکې د لبنان په سویل کې د دوی موټر په نښه کړ.
د دغو په نښه شویو جنګیالوی موقفونه نه دي په ډاګه شوي خو دغې ډلې ته نږدې سرچینې ویلي چې دوی د حزب الله جګپوړي غړي نه وو.
دغه برید په هغه سیمه کې وروستی برید بلل شوی چېرې چې اسراییل د حزب الله لسګونه جنګیالي په نښه کړي دي.
د اسراییل پوځ ویلي، چې د بهرنیو رپوټونو په اړه تبصره نه کوي.
تر دې وړاندې د سیمې اوسېدونکو او امنیتي چارواکو ویلي وو، چې یوې بې پیلوټه الوتکې له پولې اته کیلومتره لرې، کفره کلي ته څېرمه برید کړی، چې دوه کسان یې وژلي او څلور نور یې ټپیان کړي دي.
حزب الله د غزې په تړانګه کې د فلسطیني ډلې حماس په ملاتړ د لبنان په سویلي پوله کې له اسراییلي ځواکونو سره په نښتو کې ښکیل دی.