پولیټیکو راپور ورکړی چې د امریکا او نورو لوېدیځو هیوادونو لخوا راټول شوي معلومات ښیي چې حوثي ملیشې د ایران له اسلامي جمهوریت څخه د زیاتو وسلو د ترلاسه کولو په لټه کې دي. د دغو معلوماتو له مخې، د حوثیانو هدف په سور سمندرګي کې د خپلو بریدونو زیاتول دي.
د دغه راپور له مخې امریکايي چارواکي د حوثیانو د بریدونو زیاتولو د پلان په اړه معلومات له یوې میاشتې راهیسې تر څار لاندې لري او شني یې.
دا معلومات دا هم په ګوته کوي چې شونې ده حوثیان په سیمه کې پر لوېدیځو ځواکونو هم برید وکړي.
حوثیان په سور سمندرګي کې خپلو بریدونو ته د یوه تاکتیک په سترګه ګوري چې پر امریکا فشار راوړي چې د حماس پر ضد د اسراییل له پوځي عملیاتو خپل ملاتړ پای ته ورسوي. دغې ډلې د نومبر له نیمایي راهیسې په سره سمندرګي کې د سوداګریزو کښتیو په وړاندې له ۳۰ څخه ډیر توغنديز او ډرون بریدونه کړي دي.
په تېرو لسو ورځو کې د امریکا پوځ په ځلونو په یمن کې د حوثیانو په مرکزونو بریدونه کړي دي. په وروستۍ پېښه کې د امریکا جنګي الوتکو د شنبې په ورځ یو بېړۍ ضد توغندی له منځه یووړ چې توغولو ته چمتو و. د حوثیانو د توغندیو او بې پیلوټه الوتکو له ویجاړولو سره سره دغې ډلې ویلي چې خپلو بریدونو ته به دوام ورکړي.
