د طالبانو ځايي مسولینو رسنيو ويلي، چې د دې ولایت په دره صوف ولسوالۍ کې د کان کېندنې پر مهال درې کسان ګازو نيولي او مړه شوي دي. د افغانستان په شمالي ولایتونو کې تر ۲ زره زيات د ډبرو سکرو کانونه شته، چې پکې سلګونه کسان کار کوي.
د طالبانو تر واک لاندي باختر خبري اژانس د سمنګان د ولايتي مسولينو له قوله ليکلي، چې نن د سې شنبې په سهار په یوه کان کې درې کسان د ګاز نيوني له کبله مړه شوي.
د دوی د معلوماتو له مخې؛ د دې کان په مختلفو برخو کې نورو کاریګرو هم کار کاوه، چې بل چاته پکې زيان نه دی اوښتی.
د افغانستان په شمال او په خاص ډول سمنګان کې تر ۲ زره زيات د ډبرو سکرو کانونه شته.
د کانونو او پټرولیم ادارې مخکنيو مسوولينو په وار - وار اندېښنه ښودلې وه، چې زياتره کانونه په غيرې قانوني او غيرې مسلکي ډول کېندل کيږي او د زياتې مرګ ژوبلې لامل هم ګرځي.
د جلال اباد ښار یو شمېر څوکیدرانو چې د امنیتي ګواښونو له امله یې د نومونو له لیکلو ډډه کوو، نن سه شنبه (د سلواغې درېمه ) افغانستان انټرنشنل ـ پښتو ته وویل چې له یوې میاشتې راهیسې د طالبانو د ننګرهار امنیه قوماندان محمد فرید عمر او د امنیت امر طاهر مبارز د «امید اباسین» په نامه د څوګېدارانو د ګمارنې یو شرکت جوړ کړی دی.
دوی زیاتوي طاهر مبارز څواکیداران ګواښلي چې له دغه شرکت سره خپل ځانونه ثبت کړي او یا هم له خپلو دندو څخه لاس په سر شي.
د معلوماتو پر بنسټ په جلال اباد ښار کې لوړ پوړیزې ودانۍ او مارکېټونه شاوخوا ۶۰۰ څوکېداران لري.
د جلال اباد ښار ځايي څوکیداران وايي د طالبانو د کورنیو چارو وزارت څخه نیولې تر والي پورې یې خپل شکایتونه رسولي دي.
د جلال اباد د څوکيدارانو ټولنې افغانستان انټرنشنل ـ پښتو ته داسې اسناد په واک کې ورکړي چې د طالبانو کورنیو چارو وزارت امنیتي معینیت ترڅنګ د طالبانو د ننګرهار والي ملا محمد نعیم اخوند د ننګرهار امنیه قوماندانۍ ته په یوه مکتوب کې لیکلي چې د څوکېدارانو د ګمارنې، تغیر او تبدیل کې د مداخلې څخه ډډه وکړي چې دا شکایتونه پای ته ورسیږي.
د را رسېدلو اسنادو پر بنسټ د ننګرهار امنیه قوماندانۍ د ولایت والي له مکتوبه وروسته هم په جلال اباد ښار کې د ودانیو او مارکېټونو پر مالکانو خبرتیاوې وېشلې دي او دوه پوښتنې یې ترې کړي دي.
له دې ټولو شکایتونو سره بیا هم طالبانو پر ودانیو او د مارکیټونو له مالکانو د یوه استعلام له لارې پوښتنې کړې، چې د مالکانو لخوا منفي ځواب ورکړل شوو.
د جلال اباد څوکیداران وايي د طالبانو امنیه قوماندان او امنیت امر د دولتي قدرت او له بېلابېلو فشارونو سره غواړي چې د دوی لخوا جوړ شوی د څوکیدارانو شرکت کې په زوره د ودانیو او مارکېټونو مالکان او څوکیداران اړ کړي چې له دوی سره ځانونه ثبت کړي.
دوی غواړي د ودانیو او مارکېټونو مالکان د څوکېدارانو میاشتني معاشونه دغه شرکت ته وسپاري او بیا دغه شرکت په خپله خوښه یوه کمه اندازه معاشونه څواکيدارانو ته وټاکي او یا هم خپل کسان د پخوانیو څوکيدارانو پرځای وګماري.
یو ځايي څوکيدار افغانستان انټرنشنل - پښتو ته وویل: «اوس مونږه دوه وروڼه څوکيداران یوو، د میاشتې شاوخوا ۳۰ زره افغانۍ اخلو، خو طالبان وايي تاسو باید ۱۸ زره واخلئ چې دا د خپل ولس سره ظلم دی.»
په جلال اباد ښار کې د لوړ پوړیزو ودانیو او مارکېټونو مالکان اندېښنه لري که چیرې څوکېداران بدل شي نو دوی د طالبانو پر څوکېدارانو باور نه لري نو مجبور دي چې د خپل جایدادونو او دوکانونو امنیت په خپله وساتي.
له دې وړاندې د خوست ښار د پلازو او مارکېټونو یو شمېر ملکانو شکایت کړی وو، چې په دغه ولایت کې پر وسلو سمبال کسانو د کورنیو چارو وزیر سراج الدین حقاني په نامه زرواکي روانه کړې ده.
دوی ویلي وو، دغې ډلې د خوست ښار د پلازو او مارکېټونو مالکانو ته خبرداری ورکړی چې چوکیداران دې د دوی په خوښه وګوماري.