د افغانستان په چارو کې د امریکا ځانګړی استازی ټام وېسټ وايي؛ امریکا په افغانستان کې له ډېرو سترو قدرتونو سره ګډې ګټې لري. د هغه په وينا: «افغانستان داسې هېواد نه دى، چې جيوپوليټيکي سيالي دې پکې رامنځته شي.»
د چهارشنبې په ورځ د افغانستان رسنیو له استازو سره په یوه انلاین غونډه کې ټام وېسټ د افغانستان انټرنشنل د خبریال د پوښتنې په ځواب کې وویل، چې د نړۍ هېوادونه په افغانستان کې د ترهګرۍ د له منځه وړلو او ثبات په برخه کې همغږي لري.
وېسټ وویل: «په افغانستان کې موږ له ډېرو قدرتونو سره ګډې ګټې لرو. موږ غواړو چې افغانستان د هېڅ هېواد لپاره د ترهګرۍ ګواښ نه شي او هلته بیا ترهګریز بریدونه پلان نه شي.»
هغه وویل؛ هېڅ هېواد نه غواړي چې ایران او پاکستان ته د مهاجرینو سېل ورشي.
همدا راز وېسټ مني، چې د ډېپلوماتیکو هڅو همغږي او د افغانستان په اړه د نفوذ لرونکو هېوادونو له خوا د ګډ چلند غوره کول خورا پېچلي دي؛ خو هغه ټینګار وکړ، چې د دغو هېوادونو استازي باید راټول او په افغانستان کې د وضعیت د ښه کېدو لپاره پر راتلونکو ګامونو خبرې وکړي، تر څو دلته وضعیت ښه شي.
ټاکل شوې ملګري ملتونه د افغانستان په چارو کې د هېوادونو د ځانګړیو استازیو دویمه غونډه جوړه کړي. د دې غونډې وخت او ځای لا نه دي څرګند.
د امنیت شورا په غونډو کې روسیې او چین له طالبانو سره د امریکا او لویدېځو هېوادونو پر چلند نیوکې کړې دي.
دغه هېوادونه له طالبانو سره د لا زیات تعامل او د افغانستان بانک د شتمنیو خلاصون غوښتنه کوي.
د افغانستان د ۳۴ ولایتونو سوداګرو او صنعت کارانو د چهارشنبې په ورځ (د غبرګولي ۴مه) کندهار ته د خپل سفر پر مهال د طالبانو له والي ملا شيرين اخوند سره د ستونزو د حل په موخه کتلي.
له مرکز کابل څخه کندهار ته د تللو سوداګرو یوه مشر افغانستان انټرنشنل ـ پښتو ته وويل، چې غوښتل يې د طالبانو مشر هبت الله اخوندزاده سره د سوداګرۍ په برخه کې پرتې ستونزوې شريکې کړي.
د سرچينې د معلوماتو له مخې؛ له هغه سره په لېدنه بريالي نه شول او ټولې ستونزې يې د کندهار د والي له لارې د طالبانو مشر ته ولېږلې.
کندهار ته تللي سوداګر وايي، چې د سوداګرۍ او صنعت د پراختيا، په ګمرکونو کې د فساد د مخنيوي، پر لويو لارو د سوداګريزو توکو اسانه لېږد، د ماليې کمول او د پاکستان سره د ډېورنډ پر کرښه د پرتو ستونزو اړوند بحثونه شوي.
د دوی په خبره، چې د ستونزو د حل او د غوښتنو د منلو ډاډ يې تر لاسه کړی.
کندهار ته د تللو سوداګرو یو استازی وايي: «په ګمرکونو او سرحداتو کې مو ټولې ستونزې او غوښتنې د کندهار والي سره شريکې کړې موږ اطمینان تر لاسه کړل، چې تر مشرتابه پوري به رسيږي او منل کېږي به.»
د کندهار د طالبانو د والي مطبوعاتي دفتر په یوه اعلاميه کې د سوداګرو او والي د ليدنې خبر ورکړی.
د اعلاميې د معلوماتو له مخې؛ والي ملا شرین اخوند سوداګرو ته ډاډ ورکړی، چې ستونزې او غوښتنې به يې تر ملا هبت الله ورسوي.
په اعلامیه کې د والي له قوله لیکل شوي: « موږ د ستونزو د حل ډاډ درکوو، ستاسو له پانګونې او هېوادوالو ته د کاري زمينې برابرولو له کبله مننه، ستاسې ټولې غوښتنې مشرتابه ته رسوم.»
دغو سوداګرو تېره ورځ د کندهار د علماو شورا له غړو او نن مازیګر ناوخته د سوداګرۍ خونې له استازو سره هم لېدنې تر سره کړې.
