په ګلګت بلتستان کې د توکو د بیو لوړېدو په غبرګون کې د پراخو اعتراضونو له امله کارو بار په ټپه ولاړ ی. د ګلګت، سکردو، دیامر، غذر، استور، شغر، ګانچي، خرمنګ، هنزه او نګر په بېلابېلو سیمو کې هټۍ، مارکیټونه، رستورانټونه او سوداګریز مرکزونه له یوې مخې تړل شوي دي.
په خصوصي، دولتي او تعلیمي ادارو کې د ټرانسپورټ نشتوالي، تګ راتګ له ستونزو سره مخ کړی دی.
دغه اعتراضونه له تېرې یوې میاشتې راهیسې د ګلګټ بلتستان حکومت د غنمو د بیې د لوړېدا پرېکړې په غبرګون کې پیل شوي دي.
دوی خبرداری ورکړی، که غوښتنې یې ونه منل شي د قراقرم لویه لار به وتړي.
په تانګیر، استور، خرمنګ، سکردو، شگر، ګانچی، هنزه، نګر او غذر کې هم د جمعې له لمانځه وروسته اعتراضي لاریونونه او مظاهرې وشوې.
د دغو اعتراضونو سمبالوونکي احسان علي ویلي، چې د ګلګټ بلتستان اوسېدونکي د تېرو اوو لسیزو راهیسې د خپلو اساسي حقونو څخه بې برخې شوې دي.
بلخوا د ګلګټ بلتستان والي سيد مهدي شاه د جمعې په ورځ په اسلام اباد كې د پاکستان له ولسمشر عارف علوي سره وکتل او د د دغې ستونزې په اړه یې ورسره خبرې اترې وكړې.
د پاکستان له ولسمشرۍ ماڼۍ څخه په خپره شوې خبرپاڼه کې راغلي، چې ولسمشر والي ته ویلي دغه موضوع یې له لنډمهاله لومړي وزیر او د مالیې له وزیر سره شریکه کړې او هیله یې څرګنده کړې، چې ژر به دغه ستونزه هواره شي.
