د ملګرو ملتونو سرمنشي سپارښتنه کړې، چې د « ملګرو ملتونو د مرستې او کار ادارې UNRWA د کارکونکو » پر ضد لګېدلي تورونه دې"په چټکۍ سره وڅېړل" شي. د سرمنشي د ویاند سټېفن دوجاریک په وینا، هغه د دې تورونو په اورېدو سره « ټکان » خوړلی.
ښاغلي دوجاریک وايي؛ د ملګرو ملتونو سرمنشي دا سپارښتنه وروسته له هغه وکړه، چې د ملګرو ملتونو د مرستې او کار ادارې UNRWA عمومي مشر فیلیپ لازاریني په دې اړه ښاغلي ګوترش ته راپور ورکړ.
د ملګرو ملتونو د عمومي منشي ویاند په خپل پیغام کې زیاته کړې، چې ګوترش له ښاغلي لازاریني څخه غوښتي، چې ژر تر ژره دا قضیه وڅېړي او ډاډ ترلاسه کړي چې د د دوی هر کارکوونکی چې د اکټوبر په اوومه پر اسراییل د حماس برید کې یا کوم بل جرم کې لاس لري، سمدستي دې له دندې ګوښه او څیړنې دې ترې وشي.
ښاغلي لازاریني پخپل یو پیغام کې لیکلي، چې اسراییلي چارواکو دوی ته داسې معلومات ورکړي، چې د اکټوبر د اوومې برید کې د دې ادارې د څو تنو کارکوونکو لاس لرل ثابتوي.
په ورته وخت کې راپورونه وايي، چې د ملګرو ملتونو د مرستې او کار ادارې له دې تورونو وروسته خپل ۱۲ کار کوونکي له دندو ګوښه کړي دي.
له بلې خوا، د امریکا د بهرنیو چارو وزارت په یوې اعلامیه کې لیکلي، چې د دې خبر له اورېدلو وروسته چې د د ملګرو ملتونو د یادې ادارې ۱۲ کارکونکي په اسراییل باندې د حماس له خوا د اکتوبر د اوومې په برید کې ښکېل وو، اندېښمن شوي.
د اکټوبر د اوومې نېټې برید کې چې د حماس له خوا د اسراییلو په سویل کې ترسره شو، تر ۱۲۰۰ ډېر کشان ووژل شول او ۲۴۰ نور د حماس له خوا یرغمل شو.
له یاد برید وروسته اسراییل د غزې په تړانګه کې پراخ عملیات پیل کړل، چې د فلسطیني چارواکو په وینا، په دغو عملیاتو کې تر دې دمه له ۲۶ زروڅخه ډیر کسان وژل شوي دي.
