د طالبانو د سټنډرډ ملي ادارې په خپله اېکس پاڼه لیکلي، چې په نیمروز ولایت کې یې اته ټانکره بې کیفیته تېل بېرته ایران ته ورګرځولي دي. دغې ادارې نن دوشنبه د (سلواغې نهمه) ویلي، دغه تېل بې کیفیته دي او د دوی له سټنډرډ سره برابر نه وو.
یاده اداره وايي، په ټولو بندرونو کې هڅه کوي چې افغانستان ته باکیفیته توکي وارد شي.
د طالبانو د سټنډرډ ملي ادارې له سوداګروغوښتي، چې هېواد ته د بې کیفیته توکو له واردولو ډډه وکړي؛ که نه له قانوني چلند سره به مخامخ شي.
که څه هم دغه اداره تل هېواد ته د بې کیفیته توکو واردوونکو سره د قانوني چلند ګواښ کوي؛ خو داسې معلومات یې نه دي خپاره کړي، چې افغانستان ته د بې کیفیته توکو واردوونکو څخه یې تر اوسه پوري څوک نیولي که نه؟
دا په داسې حال کې ده، چې تر دې وړاندې ایراني چارواکو افغانستان په سرحدي ادارو کې د تېلو د کیفیت د معلومولو معیارونه د پوښتنې وړ بللي و.
ایراني چارواکو ویلي وو، چې طالبان د کیفیت معلومولو ماشینونو پر بنسټ نه؛ بلکې په خپل زړه او خپله خوښه ورته میعارونه ټاکي.
