د طالبانو د مالیې وزارت ادعا کړې، چې په تېرو لسو میاشتو کې له افغانستانه نورو هېوادونو ته د ۱۲۲ مېلیارډه افغانیو په ارزښت سوداګریز توکي صادر شوي دي. له دغه وزارته په خپره شوې خبرپاڼه کې راغلي، چې د دغو صادر شویو توکو ستره برخه وچې او تازه مېوې، مالوچ او تازه سابه وو.
خبرپاڼه کې راغلي، چې له هغې ډلې د ۴۳ مېلیارده افغانیو په ارزښت وچه او تازه مېوه، د ۱۶ مېلیاردو په شاوخوا کې مالوچ او د پاتې ۱۷ مېلیارده افغانیو په ارزښت تازه سابه وو چې پاکستان، هند او متحده عربي اماراتو ته صادر شوي دي.
خبرپاڼه زیاتوي، چې د دغو صادر شویو اقلامو کې د تېرو کلونو پرتله زیاتوالی راغلی؛ خو دا یې نه دي ویلي، چې د دغه زیاتوالي سلنه څومره ده.
تر دې وړاندې افغان سوداګرو شکایت کاوه، چې د افغانستان د میوو دانو د حاصلاتو پر مهال ډېر ځله د پاکستان لهخوا پر دوی لارې بندېږي او د دوی صادراتي توکي د ډیورنډ د فرضي کرښې ها خوا ایسارېږي، چې له امله یې سوداګرو ته هره پلا مېلیونونه ډالر زیان اوړي.
له بلې خوا هر کال د افغانستان په صادراتي اقلامو کې د غالیو صادرات هم د پام وړ وي؛ خو د مالیې وزارت په دغې نوې خبرپاڼه کې د غالیو یادونه نه ده شوې.
