د اروپایي ټولنې ځانګړي استازي توماس نیکولسن په کابل کې د یوې خبري غونډې پر مهال، افغانستان ته د خپل څلور ورځني سفر د پای ته رسیدو خبر ورکړ. نوموړي نن په خپلو خبرو کې همداراز وویل، چې افغانستان ته یې د سفر موخه د دوحې پر غونډه تمرکز و چې لس ورځې وروسته جوړېږي.
ښاغلي نیکولسن په دغه څو ورځني سفر کې د طالبانو له لوړپوړو چارواکو، پخواني ولسمشر حامد کرزي، د نړیوالو نادولتي موسسو له مسوولانو، د افغان ښځو په ګډون د مدني ټولنې او د سوداګرو له استازو سره د دوحې د غونډې په اړه هر اړخیزې خبرې وکړې.
د نوموړي په وینا، د دغو لیدنو په لړ کې یې د ریښتینو چارواکو، نورو افغانانو او د ډیپلوماتیکو ټولنو د استازو لیدلوري سره پرتله کړي، ترڅو د دوحې د رغنده ناستې لپاره د رښتینو هیلو په ټاکلو کې مرسته وکړي.
د افغانستان په چارو کې د اروپایي ټولنې یاد استازی وایي، د دوحې راتلونکې غونډې ته طالب چارواکي، د ښځو استازې او یو شمیر نور افغانان بلل شوي دي.
طالب چارواکو له توماس نیکولسن سره په کتنه کې ویلي، چې د دوحې غونډه کې د ګډون لپاره اوسمهال د پلاوي پر جوړښت خبرې روانې دي او په دوحه کې د غونډې د بڼې او اجرااتو په اړه به د ځینو وضاحتونو په پام کې نیولو سره پرېکړه وشي.
