د پاکستان د پرونیو ټاکنو د لومړنیو پایلو څخه جوته شوې، چې د نواز شریف په مشرۍ د مسلم لیګ ګوند په دغو ټاکنو کې د پنجاب په صوبه کې تر ټولو زیاتې رایې اخیستې دي. په پارلمان کې د پنجاب د ۴۱ څوکیو له پاره تر دې مهاله مسلم لیګ ګوند ۲۴ څوکۍ ګټلې دي.
دا رنګه په دغو لومړنیو پایلو کې معلومه شوې، چې د بلاول بوټو په مشرۍ د پیپلز ګوند په سند کې مخکښ ښودل شوی او د سند د ایالتي شورا له پاره یې ډېرې رایې اخیستې دي.
په سند کې څلورو نورو ګوندونو د پیپلز ګوند څخه کمې؛ خو په خپلو کې یې په لږ توپیر ډېرې رایې ترلاسه کړې دي.
خو د تحریک انصاف ګوند خپلواکو نوماندانو بیا په خیبر پښتونخوا کې تر نورو ټولو هغو زیاتې رایې اخیستې دي.
دا درېیم ځل دی، چې د خیبر پښتونخوا خلک په ټاکنو کې د پاکستان د پخواني لومړي وزیر عمران خان په پلوۍ رایې کاروي.
