د طالبانو د کورنیو چارو وزیر په پکتیا کې یوې غونډې ته په خپله وینا کې ویلي، «امریکایان مو د کوتک په زور باسلي دي، ځکه مو په رسمیت نه پيژني.»
سراج الدین حقاني زیاتوي چې د امریکا ولسمشر جوبایډن د ځواکونو اېستلو سره هوښاري وکړه: «چې مونږ جنګ ته ور برابر شو دوی پښې سپکې کړې.»
د طالبانو د کورنیو چارو وزارت نن جمعې ورځ د سلواغې په ۲۰ مه په پکتیا کې د سراج الدین حقاني د دوو غونډو ویناوې خپرې کړي دي.
سراج الدین حقاني په خپله وینا کې وايي «په دې اخري کلونو کې دومره زور او طاقت الله مجاهدینو ته ورکړ، چې په یو کال کې به یو پلان مونږ د خارجیانو لپاره امریکایانو لپاره نه جوړېدو، خو په دې اخر کال کې به په یوه ورځ کې سل او زر پلانونه جوړېدل، خو مونږ به دا مجاهدین را ټینگول< امریکایان مو په میټایانو، ګوړو او حلوا نه دي باسلي، بلکې د کوتک په زور مو باسلي، ځمکه مو په رسمیت نه پيژني.»
سراج الدین د خپلې وینا په یوه بله برخه کې وايي «جوبایډن دغه هوښیارتوب وکړ، چې ژر یې فیصله وکړه، مونږ سم جنګ ته ورته سیخ شوو، دوی پښې وباسلې.»
خو له افغانستان د امریکايي ځواکونو د اېستلو پرېکړه د ډونلډ ټرمپ په مشرۍ د حکومت او امریکايي پلاوي ترمنځ دوحه تړون کې شوې وه.
د ډونلډ ټرمپ د پرېکړې له مخې ټاکلې وه، ټول امریکایي ځواکونه د ۲۰۲۱ کال په مۍ کې له افغانستان ووځي، خو جو بایډن دا پرېکړه تر اګسټ پورې وغځوله.
د هغه تړون له مخې، پکار و، طالبان ټولګډونه حکومت جوړ او ښځو او نجونو ته د زدکړو اجازه ور کړي. نړیواله ټولنه په تېره امریکا د طالبانو د حکومت په رسمیت نه پېژندلو لامل هم پر دوحه تړون د دې ډلې نه درېدل ښيي.
خو د طالبانو دغه مخکښ مشر د دغه ډلې د حکومت د رسمیت نه پیژندلو په اړه وايي، چې امریکا يې په زور اېستلې ده، ځکه یې په رسمیت نه پېژني: «نو اوس مونږ افغانان هم لږ دا پرده سره وکړو، خیر یو لاس کاله دې پرېږدو مونږ دې هم په رسمیت نه پيژني»
حقاني د امریکا د اېستلو په اړه وايي « چې امریکایان مو په میټایانو، ګوړو او حلوا نه دي باسلي، بلکې د کوتک په زور مو باسلي، ځمکه مو په رسمیت نه پيژني»
سراج حقاني زیاتوي، «که څوک مو په رسمیت پيژني ښه ده او که نه مو پيژنې نو امن او خپلواکي یې ترلاسه کړي او افغانستان ته یې وروګلوي را وستلې او دا له هر رسمیت څخه یو لوی رسمیت دی. »
خو د طالبانو مخالفان او نړیواله ټولنه په دې باور دي چې د ښځو او نجونو د زدکړو او کار او همدارنګه د توندو نظریو د پلي کولو له امله طالبان کورنی مشروعیت یا رواتوب هم نه لري.
په مقابل کې طالبان وايي، چې هر څه د اسلام د شریعت له مخې کوي.